Sápmi |

Anára stággobivdit eai dohkket stáhta guolástanpolitihkka – áigot čájehit mielaset

Anára stággobivdit eai áiggo beroštit ođđa guolástanlágas, mii geatnegahttá maiddái báikálaččaid oastit guolástanlobi guovllu dápmot- ja luossajogaide. Geassemánnu 1. beaivve áigot sii ordnet miellačájáhusa Juvddujoh'gáddái, Anárii.

ari savikko
Anárlaš dutkanmeašttir ja guollebivdi Ari Savikko Govva: Mediataju Oy

Ođđa guolástanláhka ságastahttá garrasit davimus Sámis.  Anáris stággobivdit eai áiggoše doahttalit ođđa guolástanlága, mii lea bálkestan báikálaččaid gáddái dápmot- ja luossajogain. Dál báikálaččat leat seamma lohperáiddus go turisttatge. Dat suhttada anárlaš dutkanmeašttir Ari Savikko.

– Mun orun Juvddujoga gáttis ja jus hálidivččen iežan nieiddažiiguin oaggut, de galggašin dál jo várret ja oastit lobi. Oalle divrras máksit 60 euro dan moatti diimmus, jus dan lobi oba oažžuge. Dat gal orru oalle ártegis jurdda, ahte fertešin dál jo diehtit hálidango suoidnemánus šlivgestit vuokka iežan ruoktogáttis, dadjá Ari Savikko.

Áigot bivdit lobihaga

Anárlaš guolásteaddjit ja eará berošteaddjit áigot čájehit mielaset Juvddujoga gáttis geassemánu 1. beaivve, go guolástanáigodat álgá.

– Dat lea dakkár miellačájáhus guolástanlága vuostá. Eat mii gal ávžžut olbmuid dihtomielalaččat rihkkut lága ja bivdit guolástanlobi haga, váiko máŋgasat gal leat nu áigon dahkatge. Jus mii fal bastit čohkket olbmuid, de iigoson dat leat juogaládan signála mearrideaddjide, ahte mii eat sáhte dohkkehit dákkár. Mii sávvat báikki ala buohkaid geat leat beroštuvvan guolásteamis, ii dušše Juvddujoga bivddus, muhto guoskáhan dat ášši buot earáge dápmotjogaide davimus-Sámis, dadjá Ari Savikko.

Juutuanjoki
Juvddujohka Anáris lea beakkán dápmotjohka. Govva: Jukka Brusila

Eanemus Ari Savikko lea fuolas guovllu nuorain, dasgo eai davvin leat nu olus asttoáiggedoaimmat ja dál stáhta doalvu ovtta dehálepmosa, go ráddje bivddu.

– Olu guovllu nuorra nieiddat ja bárdnit leat bivdán Juvddujoga ja oahppan ain duollet dállet finihit iskkamin jusmat dohppe. Johka gáddái lea nu olu álkit vuolgit jo jávrebivdui. Dáppe eai leat ásttoáiggedoaimmat ja lea hui šallošahtti go ná šattai. Guolásteapmihan lea dákkár mii čatná olbmo ovtta báikái ja sáhttá leat juste dat sivva, ahte nuorra mearrida fas máhccat ruovttoluotta ruovttu guvlui skuvllaid mannjel, smiehtada Ari Savikko.

Nuortalaččat besset ain bivdit nuvttá Njávdánjogas

Duogáš dán áššái lea, ahte Meahciráđđehus ii šat mieđit boahttevaš guolástanáigodahkii Anára, Ohcejoga ja Eanodaga ássiide nuvttá guolástanobiid earret eará Juvddujohkii, Avviljohkii, Báhčaveaijohkii, Njávdánjohkii iige Ovnneš-ja Durtnosjoga čázadagaide. Ođđa guolástanláhka ráddje luosa- ja dápmoha goargŋunčazadagaid báikálaččaid árbevirolaš guolástanrievtti olggo beallái.

Nuortalašlága olis nuortalaččat besset bivdit nuvttá Njávdánjogas dego dánge rádjái. Dasa lassin ohcejohkalaččat besset ain guolástit nuvttá Geavu luonddumeahcis, dasgo dat riekti lea merkejuvvon sierra Geavu luonddumeahci ásahussii. Deanu bivddus mearrida Suoma ja Norgga gaskasaš guolástansoahpamuš.

Ari Savikko lei mielde Dearvva-sáddagis 9.5.2017.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä