Säämi |

Anarâšah-servi já Inarinmaan Lapinkyläyhdistys áiguh smiettâđ ovtâspargo teikkâ ovtâstum

Anarâšah-seervi toolâi ihečuákkim tuorâstuv já tobbeen šoodâi ääšist savâstâllâm. Saavâjođetteijee Anu Avaskari uáivild ete ovtâspargomáhđulâšvuođâid teikkâ ovtâstum kannat smiettâđ ráávhust.

Anu Avaskari
Anu Avaskari lii lamaš maŋgâ ive Anarâšah-seervi saavâjođetteijee. Govva: Eljas Niskanen / Yle Säämi

Anarâšah-seervi ihečuákkimist savâstâllii tuorâstuv tast, kolgâččii-uv Anarâšah-servi já Inarinmaan Lapinkyläyhdistys ry ovtâstuđ. Mihheen miärádâsâid taan ääšist ij kuittâg vala lah.

– Mij savâstâlijm esken, tot ij lah vala pettum tot äšši mut tot lii nuuvt ko smiettâmnáál maht täst ovdâskulij, muštâl Anarâšah-seervi stiivrâ värijeessân Aune Kuuva.

Kuuva ij lah vala aaibâs vises tast, maid sun jieš juurdâš taan máhđulâšvuođâst.

– Mun jiem tieđe vala, mut must lii taggaar uáinu et mađe eenâb mij lep, te tađe kievrâbeh mij lep, sun muštâl.

Avaskari: Kalga tutkâđ ráávhust

Anarâšah-seervi saavâjođetteijee Anu Avaskari uáivild, lii pyeri tutkâđ tom máhđulâšvuođâ, jis seervih porgâččii oovtâst teikkâ ovtâstuuččii. Suu mielâst kalga kuittâg koijâdiđ ääšist seervi jesânijn.

Avaskari lasseet ete sun ij tuubdâ Inarinmaan Lapinkyläyhdistys -seervi njuolgâdusâid.

– Mij njuolgâdusâin láá čielgâ ääših, maid mij tiäduttep. Tom (ovtâstum) kalga tutkâđ ráávhust. Uccáá ko mist láá puohâin resurseh já ennuv siämmááh ääših, te lii pyeri tutkâđ taam ovtâspargo já joba ovtâstum, sun iätá.

Avaskari muštâl ete seervih láá jo porgâm-uv mottoom verd oovtâst.

– Lep porgâm oovtâst täin ciälkkámušâin. Moonnâm tove piejâim oovtâst ohtsii pááppár presidentân, sun muštâl.

Varrasamosat: Säämi

Váldoođđasat

Bivnnuhamosat

Varrasamosat

Muualla Yle.fi:ssä