Sápmi |

Anáris ordnejit dubbenbeaivvi cuoŋománus

Sámekulturguovddáš Sajosis ordnejuvvo 5.4. dubbenskuvlejupmi. Dubbenskuvlejumi oahpaheaddjin ja logaldallin lea buvttadeaddji Susa Saukko.

Jietna: Susa Saukko
Jietna

Skuvlenbeaivi ordnejuvvo Anáris, Sámekulturguovddáš Sajosis 5.4. diibmu 9.00–16.00. Unna Junná buvttadeaddji Ritva Torikka muitala skuvlenbeaivvis beassá gullat máŋggabealágit áššiid dubbema birra.

– Sámedikki filbmaguovddáš Skábma ja Unna Junná leat ordnemen dubbenbeaivvi. Dat ii oaivvil ahte olbmot galggaše dan beaivve dubbet, muhto dalle oažžu diehtit dubbema birra.

– Dubbenbeaivvis oažžu diehtit mo galgá ráđđádallat daid filmmaid buvttadanfitnodagaiguin, dahje daid filmmaid lebbejeddjiiguin, makkár dubbenvuvoigtvuođaid oastin ja soahpamušat galget leat, ja mo galgá jorgaleamis váldit vuhtii dubbema. Ja jietnaneavttáriid válljen ja bagadallan, makkár dat lea. Ja eará buvttadeapmái gullevaš áššit, mii dasa gullá, maid galga dahkat dallego álggaha dakkár dubbenprošeavtta. Ja dieđusge maiddái ruhtadanvejolašvuođaid birra.

Skuvlen nuvttá ja rabas buohkaide

Skuvlenbeaivvi oahpaheaddjin ja logaldallin lea neavttár, bagadalli ja dubbenáššedovdi Susa Saukko.

– Sonhan lea bargan olu dainna dubbemiin. Jos leat mánát, de earenoamážit gullá dalle daid dubbejuvvon animašuvnnaid, de Susa leamašan olu mielde daiguin bargamen, muitala Torikka.

Ritva Torikka muitala skuvlenbeaivvi leat álgu dasa, ahte oažžut diehtit makkár áššit gullet dubbemii.

– Dát skuvlen lea oaivvilduvvon buohkaide, geat leat beroštuvvan dubbemis. Jos lea beroštuvvan vaikko ráhkadit fitnodaga, mii buvttada dubbejuvvon animašuvnnaid dahje jos hálida jietnačájáhallin dahje muđui, jos hálida dakkár buvttadanbeali smiehttat.

– Dieđus dan maŋŋá mii diehtit maid mii vel dárbbašit diehtit, dadjá Torikka.

Skuvlen ordnejuvvo suomagillii. Skuvlen lea nuvttá ja dat lea rabas buohkaide.

Skuvlejupmái galgá almmuhit maŋimustá 3.4. Almmuhit sáhttá Tarja Porsangerii čujuhussii tarja.porsanger(a)samediggi.fi, tel. 010 839 182, dahje Ritva Torikkai čujuhussii ritva.torikka(a)yle.fi, tel. 040 541 2819.

Ritva Torikka lei mielde Dearvva-sáddagis 16.3.2017.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä