Sápmi |

ArcticFinland.fi portála lea ođasmahttojuvvon

Árktalaš guovddáš Roavenjárggas lea ođasmahttán iežas neahttaportála.

ArcticFinland fi portala
Lappi Universiteahta Árktalaš guovddáža ArcticFinland.fi portálas gávnnat dieđuid Suoma árktalaš politihkkema, dutkamušaid ja ekonomiija birra Govva: Lapin yliopisto Arktinen keskus

Suoma Árktalašráđi sátnejođiheaddjiáigodat lahkona ja dán dihte Lappi Universiteahta Árktalaš guovddáš lea ođasmahttán iežas ArcticFinland.fi neahttaportála. Dat siiddut čohkkejit Suoma árktalaš doaimmaide laktáseaddji dieđuid ja ođđasiid ja sámiid birrage doppe gávdná dieđuid go fal máhttá ohcat.

Ođasmahttima ulbmiliid muitala Lappi Universiteahta Árktalaš guovddáža dieđalaš diehtojuohkima hoavda Markku Heikkilä ná:

– Dál portála lea álkkit geavahit ja dál das lea eanet sisdoalluge, go maid ovdal lea leamašan, muitala Heikkilä ođasmahttima stuorimus erohusaid boares neahttasiidduid ektui.

Árktalaš guovddáža ArcticFinland.fi portála lea juo álggahuvvon jagis 2010, muhto dan sisdollui eai leat nu ollu geargan gidden fuomášumi, go dat lea bargojuvvon eará bargguid olis. 

– Lappi lihttu bokte ožžojuvvon EAKR- ruhtadeapmi dagai viimmat vejolažžan dan, ahte dál dán siiddu sáhttá álgit duođas máidnut. Suomagielat siidduide sáhttit leat aivve duđavaččat, Markku Heikkilä rámiida portála loahppabohtosa.

Tiedeviestinnän päällikkö Markku Heikkilä Lapin yliopisto Arktinen keskus
Lappi Universiteahta Árktalaš guovddáža dieđalaš diehtojuohkima hoavda Markku Heikkinen lea duhtávaš ArcticFinland.fi ođasmahtton portálii Govva: Lapin yliopisto Arktinen keskus

– Portála sisdoalut leat sajáiduhtton buorebut ja visuálalasvuohta lea buoret. Medialinkkaid mii eat šat dohko čohkke, go dat ii min mielas doaimma. Twitter čuovvuleapmi lea dain siidduin erenomáš aktiivvalaš, man bokte sáhttá áiggedási dieđuid hui bures čuovvulit, joatká vel portála rámideami Heikkilä.

Juoga mii lea aivve ođđa ArcticFinland.fis

Árktalaš dutkamuššii leat dán portálas bidjan hui ollu návccaid. Portálii leat čohkken visot Suoma universiteahtaid ja akademiaid árktalaš dutkamušaid mielde.

– Dákkár bálvalus ii mu dieđu mielde leat vel gosge eará sajis leamašan fállun, muitala Markku Heikkinen portála aivve ođđa áššin lasihuvvon portálii.

Sápmelaččat ArcticFinland portálas

– Sápmelaččatge laktasit portálii, Jus sáhka laktása viiddes árktalaš áššiide. Mii leat leamaš várrugasat bidjat dakkár báikkálaš, Lappi siskkáldas guovllu áššit portálii, áššiin ferte leat álbmotdási dahje riikkaidgaskasaš geahčastat, muitala Heikkilä.

– Giellagažaldat boahtá maid ovdan, ahte mii eat čuovo sámegielat gálduid, dat sápmelaččaid guoski áššit mat bohtet ovdan suomagielat ođasdoaimmahemiin sáhttit fal váldit mielde portálii, muitala Heikkilä ja joatká vel,

– Sámeáššit eai leat sirrejuvvon sierra siidui, baicce daid galgá doppe roggat ovdan eará áššiid seagas, muhto gal dat doppe gávdnojit, meinne Heikkilä álgoálbmogiidda ja sápmelaččaide guoskevaš áššiid ActicFinland.fi portális.

Ii ovttain ohcansániin johtui

Ovtta ohcansániin lea dušši dán portális ohcat dieđuid, dainna prinsihpain ii gánnet daidda siidduide vuolgit surfet.

– Ohcat sáhttá, muhto dakkár ovtta ohcansátni báiki ii gávdno. Dieđuid galgá goitge vehá eanet “oaggut” dáin siidduin. Árktalaš doaibma lea viiddis, ahte vaikko ulbmil livččiige leamašan buktit geavaheddjiide álkkes neahttadiehtobáŋkku, nu duohtavuohta lea goitge dat ahte buot dárbbuide ii gávdno válmmas pakeahtta.

– Daid siidduid bakte galgá olbmuide boahtit ipmárdus, ahte mat áššit gávdnojit ja gokko bokte beassá de viidáset ohcat dieđuid, dadjá Heikkilä.

RSS feed ja Twitter

RSS –feed dahje “ođasbiebman” -doaibma gávdno ArcticFinland. fi siiddus, muhto erenomážit Twitter @ArcticFinlandia lea doaibma, man gánneha geavahit, jus háliida beaivválaččat čuovvut dieđalášportála ja čuovvut maid ságastallama áššiid birra.

Twitter taustakuva Arctic Finland
@ArcticFinlandia lea Twitterčujuhus gosa beaivvalačča ilbmet dieđut Suoma árktalaš dutkámušain ja ságastallamiin Govva: Lapin yliopisto Arktinen keskus

– Moatti mánu gaskkain almmustahttit maid ođasreivviid, masa čohkket viidáset dieđuid, mat áššit Suoma Árktalaš ságastallamis leat leamašan ovdan.

– Twittera bokte jođánis beaivválaš dieđuid ja ođasreivve bokte de njoazebut ja viidáset analysat áššiid birra, muitala ođđa bálvalusaid birra Heikkilä.

Prošeavtta ulbmilin oažžut áigái bistevaš vuogádaga portála beaivválmahttimii

Portála áigáioažžun lea boađus prošeavtta ollašuvvamis ja dieđalaš diehtojuohkima hoavda Markku Heikkilä sávváge, ahte go prošeakta nohká, de portála beaivválmahttima galggašii álkkes vuogi mielde bastit dahkat.

– Mis maid stuorra plánat boahttevuhtii engelasgielat siidduid ektui. Ráđđádallamat olgoáššiidministeriijain leat gaskan das, ahte ArcticFinland.fi engelasgielat siidduin boađášii riikkaidgaskasaš láseráigi Supmii Árktalaš guovlun, muitala Heikkilä boahttevuohta plánain, mat dieđusge dárbbašivčče lasi resurssaid ja ruđaid vai ollašuvvet.

– Positiivvalaš heakkas leat dát ráđđádallamat Olgoáššiidministeriijain manname, dárbu dieđu lasiheapmái goitge orru leamen.

Lappi Universiteahta Árktalaš guovddáža dieđalaš diehtojuohkima hoavda Markku Heikkinen vel sávvá olbmot fitnet geahččame ArcticFinland.fi ođasmahttojuvvon siidduid.

– Jus doppe surfedettiin fuobmá áššiid maid birra háliida kommenteret ja addit buoridanevttohusaid, de ii leat earágo váldit oktavuođa, mii geahččalit buoridit bálvalusamet.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä