Sápmi |

Boahtte gease eai leat Luossariemut Ohcejogas

37. luossariemut eai ordnejuvvo dán gease Ohcejohnjálmmis. Sivvan dasa lea Deanu soahpamuševttohusa gieđahallama ádjáneapmi.

Jietna: Luossariemuid 2015 vuoitit.
Jietna

Utsjoen eränkävijät –searvvi stivra lea bargan mearrádusa, ahte 37. luossariemuid eai sáhte ordnet boahtte suoidnemánus.

– Dat mearkkaša dieđusge dan, ahte dál boatkana dat 36 jagi jo joatkašuvvan árbevierru. Mis lea duođai leamašan 36 jagi juohke gease dát Ohcejoga Luossariemut -dáhpáhus ja luossagonagasgilvu. Ja dál de bođii dakkár áigi, ahte mii eat dan sáhte ordnet boahtte gease, muitala Utsjoen eränkävijät –searvvi ságadoalli Jarmo Helander.

Sivvan dása Helander muitala dan, ahte Deanu ođđa njuolggadusráđđádallamat leat ain gaskan.

– Mii leat ovddit jagiid ohcan ja fidnen EJB-guovddážis dakkár earenoamášlobi dása gilvui, mii darkkuhii dan, ahte olgobáikegottálaččat leat ožžon suhkat dmu 12 rájes eahket čieža rádjái iehčanassii, ahte sii eai leat dárbbašan dalle báikkálaš suhkki, go muđui dábálaččat dan áigge lea dárbbašan.

– Muhto dál mii leat jearran doppe EJB-guovddážis mo mii fidnet dán lobi, ja sii leat vástidan, ahte sii eai sáhte vel addit dan lobi midjiide, go dat ráđđádallamat leat gaskan. Ja jáhkkehahtti jos boahtá dat ođđa njuolggádus, dange dihte sii eai fidne dan lobi.

Váikkuha Eränkävijät-searvvi ruhtadillái

Helander muitala, ahte go eai beasa luossariemuid ordnet, searvvis báhcá fidnekeahttá váile 10 000 euro.

– Dat lea hui stuorra ruhta dieđusge, ja eat leat vel dál dieđus smiehttan maidege ođđa áššiid. Muhto mii doaivut, ahte dát livččii dušše okta jahki, ahte mii eat sáhte ordnet. Ja dieđusge doaivut, ahte boahtteáiggis sáhttit fas joatkit daid luossagonagasgilvvuid ordnema.

– Dát dieđusge velá bođii vehá fuones áigái min dáfus, dan sivas ahte mis leat visttit, maidda leat bargan viehka stuorra remonttaid. Muhto lihkus leimmet vehá seastán ruđa, ahte eat mii aivve nallasan dán ášši dihte, muitala Helander.

Searvvis ledje goittotge máhttán veháš vuorditge, ahte luossariemuid eai sáhte ordnet.

– Ii dat gal aivve heahkastupmin boahtán. Galhan mii leat vehá álgán smiehttat dan jo mannan suoidnemánus, go lei dat maŋimuš luossariemut. Mii leat vehá leamaš dan mielas, ahte sáhttá geavvat dan láhkai. Ja dán jagi bealde lea vehá álgán orrut dán lahkai, ahte dieđus ná geavvá.

Jarmo Helander lei miele Dearvva-sáddagis 16.3.2017.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä