Sápmi |

Boazodoallu lea ožžon unnán negatiiva máhcahaga geatkebivddus

Eanan- ja meahccedoalloministeriija attii guovvamánus ásahusa, mii attii lobi gávcci geatkki goddimii boazodoalloguovllus. Dál gávcci geatkki leat goddojuvvon.

Jietna: Anne Ollila
Jietna

Bálgosiid ovttastusa doaimmajođiheaddji Anne Ollila muitala, ahte sidjiide ii leat boahtán olu máhcahat.

– Muhtin ovttaskas šleađgaboasttat leat boahtán.

Ollila ii jáhke, ahte gávcci geatkki goddin hehttešii menddo olu boazodoalu imago.

– Galhan boazu lea ealli, mii eallá luonddus ja lea álo eallán. Luonddus ellet maiddái spiret, ja dieiguin geahččalit birget nu bures go vejolaš. Dat dárkkuha maiddái dan, ahte dalle go šaddet liiggás stuorra konflivttat spiriiguin, galgá áššái beassat bargat juoidá.

– Ipmirdan gal dan, ahte geatki lea hárvenaš áitatvuloš šládja ja dan suodjalit aivve sivas. Ii mange dáhpáhusas leat dárkkuhus geatkki suodjaleami daninassii kritiseret.

"Áidna vuohki hálddašit spirevahágiid"

Anne Ollila jáhkká, ahte maiddái boahttevuođas dárbbašit dákkár spiehkastanlobiid geatkebivdui.

– Dát spiehkastatlobiin bivdin lea áidna vuohki hálddašit daid spirevahágiid. Ja dán sihkkarit boahttevuođasge dárbbašit.

Son lasiha vel, ahte bálgosiid ovttastupmái heive maid jos gii nu áiggošii sirdit getkkiid muhtin eará guvlui.

– Jos mii nu guovlluid háliida váldit getkkiid vuostá, de Bálgosiid ovttastupmi lea mielas fárus dákkár doaimmas.

"Eai dieđe duohtavuođa"

Gávcci geatkkis guokte goddujedje Giehtaruohttasa bálgosis. Bálgosa boazoisit Juha Tornensis muitala, ahte son ii bala, ahte sosiála media stuimmit čuhcet boazodollui.

– In mun gal dange bala. Dieđus dat lea dát áigi, go johtá johtilit diehtu. Mii diehtit birra máilmmi mii dáhpáhuvvá, dathan buktá dakkár váttisvuođaid.

Juha Tornensis 2016
Juha Tornensis Govva: Juha Tornensis

– Galhan dat lea álo, boazodoallit leat leamaš dollon sivalažžan ja meahcceelliid garraseamos vašálažžan, dasa lea gosit jo álgán dolkat. Muhto dat lea dieđus buorre, ahte dat lea medias nu lea vuordimis, ahte ráfáiduvvá go besset ášši birra hupmat.

Tornensis goit lea ieš seston bealkimis geatkebivddu dihte.

– Ii  mu gal leat oktage bealkán. Gal mun lean ságastallan daid suodjaleddjiiguin dán ášši birra ja dieinna lágiin muitalan ja čilgen makkár dilli lea.

– Eaihan dat gal ádde dan ášši ollenge, go dat lea daidda veháš dakkár ášši, maid dat jurddašit iežas jurdagiiguin eaige dieđe makkár lea duohtavuohta.

Anne Ollila ja Juha Tornensis leigga mielde Buorre iđit Sápmi -sáddagis 16.3.2017.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä