Sápmi |

Boazodoalu ja luondduealáhusaid doarjagiid ohcan lea rahpasan – dopme rahpat ohcama nuoraid geažil

Boazodoalu ja luondduealáhusaid investeren- ja álggahandoarjagiid sáhttá fas ohcat otnáža rájes. Doarjagat bohtet máksinlahkái goittotge easka jahkemolsumis.

Boazu
Govva: Vesa Toppari / Yle

Boazodoalu ja luondduealáhusaid investeren- ja álggahandoarjagiid sáhttá fas ohcat Lappi EJB-guovddážis. Doarjagiid sáhtta ohcat dál álggos dušše báberskoviiguin, maŋŋeleappos lea vejolaš ohcat maiddái neahta bokte. Nuortalašlága vuollásaš doarjagiid ohcan rahpasa boahtte vahkus.

Doarjaáigodat mii dál álgá, nohká 15.9.2017. Mearrádusaid dahkan EJB-guovddážis álgá áramusat 16.9 ja doarjagat bohtet máksinlahkái easka jahkemolsumis.

Dopme rahpat ohcama nuoraid geažil

Boazodoalu álggahandoarjagiid sáhttá dál fas ohcagoahtit bottu mannjel. Ođđa ášši álggahandoarjagiin lea dat, ahte nuorra boazobargi sáhttá dakkaviđe oastit bohccuid iežas ovddasvástádusain, go fal álggahandoarjjaohcamuš lea joavdan Lappi EJB-guovddážii. Lappi Bargo- ja ealáhusguovddáža boazodoalloáššedovdi Päivi Kainulainen dadjá, ahte dopme rahpat ohcama álggahandoarjaga geažil.

– Rabaimet doarjjaohcama jur nuoraid geažil. Jus nuorra boazodoallit áigot dahkat boazogávppiid, de sáhttet dahkat dan vel dán boazodoallojagi bealde ja bidjat ohcama sisa EJB-guovddážii, muitala Päivi Kainulainen.

Álggahandoarjaga ferte ohcat ovdal go ohcci deavdá 41 jagi. Ođđa doarjjaortnet vuollái 40-jahkásaš boazodoalliide lea maiddái dat, ahte jus eaiggáda 50-79 bohcco, de sáhttá ohcat doarjaga bohccuid ja mohtorfievrru oastimii. Vai oažžu doarjaga, de ohcci ferte čatnasit bargat 60 bargobeaivvi maid bálggus dohkkeha golmma boazodoallojagi áigge.

Gielká- ja njealljejuvllatdoarjagiidda rievdadusat

Gielkádoarjagiid sáhttá oažžut golmma jagi gaskaid, jus fas ohcci lea dahkan boazodoallojagis 45 bargobeaivvi maid bálggus lea dohkkehan. Njealljejuvllagiidda investerendoarjaga sáhtta oažžut njealji jagi gaskaid, go fal lea bargan 30 beaivvi boazodoallojagis. Muđuid doarjaga sáhttá ohcat viđa jagi gaskaid.

Stáhtadáhkádusa sáhttá dál ohcat vuosttaš geardde boazodoalu ja luondduealáhusaid hárjeheapmái. Ovdal dákkár vejolašvuohta ii leat leamašan. Stáhtadáhkádusa sáhttá oažžut bohccuid oastimii, viesu huksemii ja maiddái eará visttiid huksemii, maid luondduealáhusaid hárjeheamis dárbbaša. Stáhtadáhkádus sáhttá leat 30 % ollislaš ruhtadansupmis.

Investeren- ja álggahandoarjagiid ohcanskoviid gávnnat dáppe.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä