Sápmi |

Boazoealáhusa ja eanandoalu gaskasaš riidduid geahččalit soabadallat ođđa foruma bokte

Boazoealáhusa ja eanandoalu gaskasaš riidduid geahččalit dál soabadallat ođđa foruma bokte. Deháleamos lea oažžut ságastallama johtui, oaivvilda foruma ságadoalli Hannu Linjakumpu.

Bohcct muhtin bealddus Hyrynsalmis. Govva: YLE / Kalle Heikkinen

Eana-ja meahccedoalloministeriija lea bidjan johtui boazodoalloguovllus ráđđádallanforuma. Foruma bargun lea jo ovddalgihtii eastadit boazoealáhusa ja eará eanangeavaheaddjiid gaskasaš riidduid.

Ráđđádallanforumii leat čohkken lahtuid sihke boazodoalu ja maiddái eanandoalu bealde. Foruma ságadoalli Hannu Linjakumpu Lappi EJB-guovddážis muitala, ahte sii áigot dál vuos vuoruhit boazodoalliid ja eanadoalliid ja eananeaiggádiid gaskasaš sierramielalašvuođaid.

– Forum bargá dál vuos boazodoalloguovllu máttimus guovlluin, gos leatge eanamus riiddut boazodoalu ja eanandoalu ja eananeaiggádiid gaskkas. Doppe leat maiddái eanamus bealdovahágat ja váttisvuođat dainna, ahte bohccot mannet eanandoalliid bealdduide. Doppe leat riiddut bistán jo máŋggaid jagiid ja dasa geahččalit dál gávdnat juogalágan čovdosiid ja oažžut ságastallama johtui, muitala ráđđádallanforuma ságadoalli Hannu Linjakumpu.

Vulget báikki ala

Ráđđádallanforumas leat ovddasteaddjit Bálgosiid Ovttastumis, Sámedikkis, Lappi bolesis, Lappi guovllohálddahusdoaimmahagas AVI:s, Lappi EJB-guovddážis ja Eana-ja meahccedoallobuvttadeaddjiid Guovddášlihtus MTK:s sihke Lappis ja Davvi-Suomas.

Poroja pellolla
Govva: Raimo Torikka / Yle

Forum lea deaivvadan jo oktii ja ulbmil livččii, ahte dat deaivvadivččii máŋgii jagi áigge, gulašii áššedovdiid ja oahpásmuvašii báikkálaš diliide ja doaibmiide. Ráđđádallanforum ii goittotge gieđahala ovttaskas áššiid, mat gullet boazodoallolága mielde árvvoštallanlávdegottiid doaibmaválddi vuollái.

– Ulbmil livččii, ahte ráđđádallanforum vuolgá galledit dakkár guovlluid, gos sierramielalašvuođat leamašan ollu. Foruma bokte goappašat ealáhusat, boazodoallu ja eanandoallu ja guovllu ássit besset muitalit iežaset beali ja evttohit mo riidduid sáhtášii čoavdit.  Vaikko riiddut leatge muhtin guovlluin, de stuorámus oasis boazodoalloguovllus ealáhusat soabadit ja birgejit bures ovttas, deattuha Hannu Linjakumpu.

Sáhttet bargagoahtit maiddái guohtunriidduiguin

Ráđđádallanforuma doaibmabadji bistá jahkái 2020. Foruma ságadoalli Hannu Linjakumpu muitala, ahte vejolaččat sii bargagohtet baji áigge maiddái eará riidoáššiiguin, degomat guohtunriidduiguin.

– Eat leat vel ollen smiehttat dađi dárkileabbot, muhto dieđusge doaibmabadji lea guhki ja sáhttá leat, ahte maiddái guohtunriiddut bohtet forumis barggu vuollái. Dál goittotge hohpoleamos ja deháleamos ášši leat bealdovahágat, dadjá Hannu Linjakumpu.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä