Sápmi |

Davvi-Sámi eanangoddelávva 2040 plánenbargu álggahuvvon – Jiekŋameara ruovdegeaidnu guovddášáššin

Davvi-Sámi eanangoddeláva 2040 plánenbargu lea dál álggahuvvon. Guovddáš ášši, mii lávvabarggus guorahallojuvvo, lea Jiekŋameara ruovdegeaidnu.

Lapin vaakuna ja Lapin seutukuntakartta
Govva: Raimo Torikka / Yle (kartta: Lapin liitto)

Davvi-Sámi eanangoddeláva 2040 plánenbargu lea dál  álggahuvvon ja oaidninláhkái. Eanangoddelávva lea strategalaš ovdánahttima gaskaoapmi, mii váikkuha gielddaid lávvaráhkadeapmái, eará guovlluidgeavaheapmái ja eiseválddiid doaibmamii.

Davvi-Sámi eanangoddelávva guoská Anára, Soađegili ja Ohcejoga gielddaide.

Davvi-Sámi eanangoddeláva 2040 loahpalaš ulbmilat šaddet dárkilebbon jagiid 2017–2018 áigge guovllu gielddaiguin, ássiiguin, ealáhusaiguin ja Sámedikkiin ja eará čanusjoavkkuiguin čađahuvvon ulbmilságastallamiid vuođul.

– Davvi-Sámi eanangoddelávva 2040 lea dan dáfus earenomáš, ahte guovllus leat viiddis Natura-guovllut ja oassi guovllus gullá sámiid ruovttuguvlui. Guovlu maiddái guoská ránnjáriikkaide, nuba rájárasttildeaddji váikkuhusaidge galgá árvvoštallat, muitala Lappi lihtu plánenhoavda Riitta Lönnström.

Jiekŋameara ruovdegeaidnu guorahallama vuolde

Guovddáš ášši, mii lávvabarggus guorahallojuvvo, lea Jiekŋameara ruovdegeaidnu. Maiddái eará johtalusoktavuođat, ruvkedoaibma ja minerálapotentiála, galbmateknologiija, testendoaibma, turisma, energiijabuvttadeapmi ja fápmojođasfierpmádat, rádjarasttildansajit ja Bealuštanfámuid ja rádjegozáhusa dárbbut galget vuhtii váldojuvvot.

Eanangoddelávvaproseassa áigge lávvahápmosis ja lávvaevttohusas bivdojuvvojit cealkámušat, oaivilat ja muittuhusat eiseválddiin, guovllu gielddain, servošiin, fitnodagain ja eará oasálaččain.

Gullandilálašvuođat guovllu buot gielddain

Ássiid gullama várás lávas ordnejuvvojit gullandilálašvuođat guovllu buot gielddain. Davvi-Sámi eanangoddelávvaproseassa sáhttá čuovvut Lappi Lihtu neahttasiidduin.

Eanangoddeláva ráhkadeapmi lea máŋgga jagi proseassa ja dat ođasmahttojuvvo sullii 10-12 jagi gaskkain. Ulbmilin lea, ahte Davvi-Sámi eanangoddeláva 2040 válmmaštallanmateriála biddjo oaidninláhkái jagi 2018 loahpageahčen ja lávvaevttohus jagis 2020.

Davvi-Sámi eanangoddeláva 2040 oassálastin- ja árvvoštallanplána lea oaidninláhkái gielddain ja Lappi lihtu Internet-siidduin.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä