Sápmi |

Deanu guollebivdolobiid vuovdin álgá Suoma bealde

Gaskavahku álgá Deanu guolástuslobiid vuovdin neahtas Suoma bealde.

Tenojoki
Govva: Vesa Toppari / Yle

Deanu turismaguollelobiid neahttagávpái sáhttá dál registeret. Lohpebáikki čujuhus lea www.tenonkalaluvat.fi.

Turismaguollelobiid vuovdin álgá gaskavahku 10.5. diibmu 14.

Vuollel 18-jahkásaččat sáhttet oastit vehá hálbbibut lobiid. Fatnasis oaggunlohpi máksá 40 euro ja gáttis oaggun 25 euro.

Ná lohpevuovdin neahtas doaibmá

Geavaheaddjidovddaldat neahttagávpái dahkkojuvvo neahttagávppi ovdasiiddu badjeravddas go coahkkala Kirjaudu sisään -boalu ja siiddus, mii rahpasa, de coahkkala registeremii čujuheaddji báikki. Registeremii beassá maid njuolga čujuhusas www.tenonkalaluvat.fi/rekisteroidy.

Geavaheaddjidovddaldahkii addojuvvo iežas šleađgapoastačujuhus, namma, riegadanáigi, sohkabealli, čujuhus ja riikkavulošvuohta. Šleađgapoasta doaibmá geavaheaddjidovddaldahkan ja dan lassin geavaheaddji galgá hutkat vel suollemassáni. Go registeren lea dahkkon, de lohpegávpái beassá sisa geavaheaddjidovddaldagain ja suollemassániin.

Neahttagávppis oston lobi ferte viežžat lohpevuovdinbáikkis

Neahttagávppis ostojuvvon lohpi čálihuvvo lohpebáikkiin lohpekodain, man oažžu neahttaoastima oktavuođas. Lohpi čáliheamis berret unna mávssu. Lobi čáliheami oktavuođas lohpebáikkis sihkkarastojuvvo maiddái, ahte Deanu guolásteamis geavahuvvon stákkut ja eará oaggunráđit leat buhttá.

Deanu guolástuslobiid leat juohkan Suoma ja Norgga gaskkal ja lobiid sáhttá boahttevuođas oastit sihke Suomas ja Norggas, go registere iežas joappá goappá riikka elektrovnnalaš lohpegávpái. Lobiid čálihit dan riikkas, gos lohpi lea oston. Norgalaš lohpegávppi siiddus almmuhit, ahte Norgga beale lohpevuovdin álgá 15.5.

Turismaguolástusáigi Deanus álgá 10.6.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä