Sápmi |

Deanu lohpevuovdimis teknihkkalaš váttisvuođat – measta buot lobit dattetge vuvdojuvvon

Deanu lohpevuovdin ii leat vuolgán beare njuovžilit johtui teknihkkalaš sivaid geažil. Dattetge measta buot Deanu turismaguollelobit leat vuvdojuvvon ovtta jándoris.

Vapa.
Deatnu geasuha turistabivdiid. Govva: Pasi Peiponen / Yle

Deanu turismaguollelobiid neahttagávpi leamašan rabas dál vádjit jándora, muhto ii fal váttisvuođaid haga. Ikte gaskavahkko neahttagávppi illá doaimmai, go nu oallugat šávihedje oktanaga oastit guolástanlobiid.

Váttisvuođaid sivvan ledje beare unna fierbmeoktavuođat dan ektui, ahte neahttagávppašeaddjit fas ledje nu olu.

Bargo- ja ealáhusguovddáš ásahan sierra áššehasboastakássa

Váiko lohpegávppis leamašan váttisvuođat, de measta buot Deanu turismaguollelobit leat vuvdojuvvon. Bargo- ja ealáhusguovddáš šálloša neahttalohpegávppi váttisvuođaid.

BE-guovddáš leage ožžon olu máhcahaga ja dan geažil dat lea šaddan ásahit sierra áššehasboastakássa, masa áššehasat sáhttet sáddet boasta ja jearrat vejolaš váttisvuođain. Áššehasboastakássii sáhtta almmuhit omd. dakkár dáhpáhusain, main lobit leat vuolgán máksui, muhto eai vel oidno iežas siiddus.

Áššehasboastakássa čujuhus lea lupaselvitys@tenonkalaluvat.fi.

Eananáiggádiid sierra fástalobiin vejolaš oažžut guolastanlobiid

Váiko stuorámus oassi Deanu turismaguollelobiin leage jo vuvdojuvvon, de eananáiggádiid sierra fástalobiin lea vel vejolaš oažžut guolastanlobiid.

Norgga lohpegávpi ráhpasa manjemuš dieđuid mielde duorastaga ja bearjadaga gaskasaš ija diibmu 00.00 Norgga áigge ja doppe lea maiddái vejolaš oastit lobiid Deanujohkii.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä