Sápmi |

Deanu vuoigatvuođaid oamasteaddjit stevdnejit Suoma ja Norgga stáhtaid diggái

Deanu vuoigatvuođaid oamasteaddjit áigot stevdnet Suoma ja Norgga stáhtaid diggái. Sii oaivvildit, ahte ođđa Deanu soahpamuš rihkku nu máŋggaid lágáid, ahte ii leat eará vejolašvuohta go gearregastit.

Tenojoki
Govva: Eljas Niskanen / Yle

Deanu vuoigatvuođaid oamasteaddjit čoahkkimaste dán vahkus Ohcejogas ja sáhkan lei Deanu soahpamuš. Njuorggáma guolástangotti várreságadoalli Aslak Holmberg muitala, ahte go jo stáhta bálkestii sin gáddái, de sis ii leat eará vejolašvuohta go stevdnet Suoma ja Norgga stáhtaid diggái.

– Mii leat nannosit dan oaivilis, ahte dat ii leat dohkálaš. Čuovvovaš ášši lea gearregiidda mannat dáinna áššiin. Min figgamušat váikkuhit láhkii ovdal leat badjelgehččojuvvon, nu groávvát leat min bidjan gáddái, ahte ii leat eará vejolašvuohta go bidjat goappašat stáhtaid diggái, dadjá Aslak Holmberg.

Stáhta lea rihkkon lága

Deanu vuoigatvuođaid oamasteaddjit áigot doallat seminára ovdal bivdoáigodaga ja ulbmil livčče doppe de gieđahallat vel dárkileabbot váidin geainnuid, muitala Aslak Holmberg.

– Ráhkkanan doaimmat diggái leat álgán jo áigá, go leat oaidnán ahte ođđa Deanu soahpamuš manná čađa. Galhan dat orro nu čielggas, ahte máŋggat lágat leat rihkkojuvvon. Mus gal lea buorre doaivva, ahte jus dat dikkit galget vuoiggalašvuođa ja lágaid čuovvuma gozihit, de mun jáhkan nannosit, ahte mii boahtit birget doppe, dadjá Holmberg.

Aslak Holmberg
Aslak Holmberg Govva: Vesa Toppari / Yle

Dat ii leat vel čielggas, ahte gii dahjege mii diggeášši vuodjá ovddosguvlui.

– Dat čielgá dađistaga. Jus smiehttat riikkaidgaskasaččat, doppe ovttaskas olmmoš lea áššeguoddi. Son sáhttá ovddastit olles álbmoga dahjege dalle nu, ahte ovttaskas olbmo mearrádus šaddá dakkár ovdadáhpáhus, ahte dan bokte čielgá dat ášši  earáid ektui maid. Mii leimmet dán vahkus  25 olbmo čoahkis, eanaš vuoigatvuođaid oamasteaddjit. Ja dat dat árvideamis šaddet dat, geat dikki bokte maiddái ášši vudjet, muitala Njuorggáma guolástangotti várreságadoalli Aslak Holmberg.

Divvojuvvon 20.4.2017  diibmu 14.00 Lasihuvvon, ahte áigot stevdnet maiddái Norgga stáhta diggái.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä