Sápmi |

"Doaimmatgo don sámekultuvrra bievvalin?" – Suohpanterror sáddii riikkabeaiáirasiidda poastakoarttaid

Poastakoarttas guokte sápmelačča heaŋgába, harcojuvvon Sámi šaldái. Koarttaiguin vigget buktit ovdan sámiid fuola Deanu-soahpamuša ektui.

Suohpanterror
Govva: Suohpanterror

Suohpanterror-dáiddárkollektiiva lea sádden Suoma riikkabeaiáirasiidda poastakoarttaid. Daiguin vigget buktit ovdan sámiid fuola Deanu-soahpamuša ektui.

Poastakoarttas guokte sápmelačča heaŋgába, harcojuvvon Sámi šaldái. Govvateavsttas čuožžu "Doaimmatgo don sámekultuvrra bievvalin?"

– Deanu soahpámuš lea vuolláičállojuvvon gulakeahttá eamiálbmoga ja Sámedikkiid. Jus bealuštat Deanu soahpamuša leat ollašuhttimen sámekultuvrra álbmotgoddima, koartta nuppi bealde čuožžu.

"Deanu soahpamuša dohkkeheapmi dagahivčče stuorra kriissa sámiid ja Suoma stáhta gaskii"

Suopma ja Norga áigot garrasit ráddjet luossabivddu Deanus jagi 2017 rájis. Njuolggadusaiguin geahččalit rádjet bivddu 30 proseanttain dálážis. Dárkkuhus lea ráddjet ja geahpedit buot guolásteami, maiddái árbevirolaš bivdovugiid.

Suohpanterror oaivvilda, ahte jos guolásteami galgá ráddjet Deanus, dan ii galgga ráddjet vuostamužžan sámiin. Deatnu ii sáhte leat biebmoáitin olles Supmii.

– Deanu soahpamuš oktan ođđa Meahciráđđehus- ja guolástanlágaiguin duššadit árbevirolaš eallinvuogi, mii lea vuođđuduvvan bistevaš vuorrováikkuhussii luondduin, Suohpanterror čuoččuha.

Suohpanterror háliida muittuhit mearrideaddjiid das, ahte sin mielas Suopma lea rihkkon sámedikki, vuođđolága ja buori hálddahusvuogi Deanusoahpamušášši meannudeamis.

Smielas sámiid eai leat gullan soahpamušráđđádallamiin doarvái.

– Dan sadjái, ahte Suoma stáhta ON:a ávžžuhusaid mielde buoridivččii sápmelaččaid sajádaga, riikabeaiáirasat heajudit ja njulgestaga uhkidit sin mearradusaiguin sámekultuvrra ceavzineavttuid. Mahkáš luosa suojaleami namas báikkálaš sámekultuvra ja ealáhusvejolašvuođat duššaduvvojit, Suohpanterror oaivvilda.

– Ođđa Deanusoahpamuša dohkkeheapmi ja fápmuiboahtin dagahivčče stuorra kriissa sámiid ja Suoma stáhta gaskii. Dán mii eat háliit, muhto baicca háliidit joatkit árbevirolaš ealáhusaideamet min dološ návddašanrivttiid vuođul, Jenni Laiti Suohpanterror-kollektiivvas lohká.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä