Sápmi |

Duohtavuođa- ja soabadankomitea ovdána – vuosttaš dáhpáhusat jo čakčat, árvala Sanila-Aikio

Stáhta ja sámediggi leat odne virggálaččat soahpan álggahit duohtavuođa- ja soabadanproseassa. – Mii leat soahpan álggahit proseassa ja ulbmilin lea dahkat dan nu johttilit go vejolaš buriin ovttasbargguin stáhtain ja sámiid gaskkas, dadjá Sámedikki ságadoalli Tiina Sanila-Aikio.

Stáhtaminister Juha Sipilä ja Sámedikki ságadoalli Tiina Sanila-Aikio 5.5.2017.
Stáhtaminister Juha Sipilä ja Sámedikki ságadoalli Tiina Sanila-Aikio 5.5.2017. Govva: Valtioneuvosto

Stáhta ja sámediggi leat odne virggálaččat soahpan álggahit duohtavuođa- ja soabadanproseassa.

– Dat mearkkaša dan, ahte dál álgit mii ráđđádallat, ahte makkár sisdoaluin, mandáhtain, resursaiguin dat doaibma vuolgá johtui. Muhto dainna ulbmiliin, ahte dál go mis lea Suoma 100 jagi ávvujahki ja dan fáddá lea ovttas, de maiddái dán proseassa mii gohčodit dás ovddosguvlui "Ovttas", muitala sámedikki ságadoalli Tiina Sanila-Aikio.

Soabadanproseassa álggaheapmi lea leamašan okta Sámedikki ulbmiliin dán válgabadjái. Praktihkalaš dásis hui uhccán lea vel čielggas. Dat ii goittotge njeaidde Sanila-Aikio ilu.

– Stuorra ášši lea dat, ahte mii leat virggálaččat soahpan dál stáhta ja sámedikki gaskkas, ahte mii álggahit dakkár proseassa, masa sámi servodat lea oaidnán dárbbu ja dat lea mu mielas mearkkašahtti.

Vuosttaš dáhpáhusat jo boahtte čavčča

Stáhtaráđi dieđáhusa mielde stáhtaministera ja Sámidikki deaivvadeamis lei rabas ja buorre vuoigŋa.

Sámediggi stivra deaivamin stáhtá njunnožiid. Govas Sámedikkis láhkačálli Kalle Varis (gurot), hálddahushoavda Pia Ruotsala, stivralahttu Nilla Tapiola, stivralahttu Magreta Sara, stáhtaminister Juha Sipilä, Sámedikki ságadoalli Tiina Sanila-Aikio, 2. várreságasoalli Tuomas Juuso, stáhtaministera stáhtačálli Paula Lehtomäki ja Sámedikki stivralahttu Pentti Pieski.
Sámedikki stivra deaivamin stáhtá njunnožiid. Govas Sámedikkis láhkačálli Kalle Varis (gurot), hálddahushoavda Pia Ruotsala, stivralahttu Nilla Tapiola, stivralahttu Magreta Sara, stáhtaminister Juha Sipilä, Sámedikki ságadoalli Tiina Sanila-Aikio, 2. várreságasoalli Tuomas Juuso, stáhtaministera stáhtačálli Paula Lehtomäki ja Sámedikki stivralahttu Pentti Pieski. Govva: Valtioneuvosto

Seamma dieđáhusa mielde sohpojuvvui, ahte soabadanproseassa álggahit nu johttilit go vejolaš. Dađi eanet ii vuoigatvuohtaministeriija sámi áššiid vástideaddji Johanna Suurpääge dáhto vuos muitalit proseassa ovdaneamis ja dan eavttuin.

Sanila-Aikio mielde eambbo diehtu dáidá jo lagamuš vahkuid áigge.

– Mun jáhkan, ahte vuosttas dáhpáhusat mat gusket dása leat jo čakčat. Dassážii ferte dieđus sihkkarit olu ordnet ja leat maiddái olu áššit maid birra ferte soahpat. Mun sávan ahte geassemánu bealde mii leat jo diehtimin eanet, lohká Sanila-Aikio.

Ođđa álgu sámiid ja Suoma stáhta gaskii?

Suoma stáhta ja Sámedikki gaskavuohta lea maŋimuš jagiid leamaš váttis. Dasa lea váikkuhan sámi láhkafitnuid gopmáneapmi ovddit ráđđehusbajis.

Sámedikki oainnut eai leat ožžon stuorra saji dánge ráđđehusa áigge, mas maŋimuš beahttašupmin lei Deanu guolástansoahpamuša dohkkeheapmi báikki olbmuid ja Sámedikki vuostálasttimis fuolatkeahttá. Sámediggi lea dovddahan váilevaš luohttamuša Suoma mearrideaddjiide maiddái riikkaidgaskasaš lávddiin.

Sámedikki ságadoalli Tiina Sanila-Aikio ii dáhto dadjat nu olus luohttamuša dálá dillái.

– Váttis dadjat. Mii leat nu máŋggain áššiin dál gártán vuollánit ja dáistalit. Mun sávan ahte dás lea ođđa álgu buorit boahttevuođa guvlu. Nugo mii leat dán rádjáige diehtán de buot dat koarttat leat stáhta gieđas, lohká Sanila-Aikio.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä