Sää´mjânnam |

Eʹčč Rauno veekk ooudâs ortodokslaž paapp tuâjjvueʹjjid sosiaal mediaaʹje – vaʹlljeeš eeʹjj tuejjliʹžžen

Ortodokslaž ceerkav vaʹlljii Lappi sieʹbrkååʹdd eʹčč Rauno tän eeʹjj tuâjjliʹžžen. Rauno Pietarinen lij tuâjas kaunnâm ođđ vueʹjjid puʹhtted Vuâsppååʹd sääʹn sieʹbrkåʹddniiʹǩǩid ouddmiârkkân Youtube pääiʹǩ.

Jietna: Rauno Pietarinen
Jietna

Ortodokslaž ceerkav lij vaʹlljääm Eʹčč Rauno eeʹjj tuejjliʹžžen. Pietarinen lij tuâjas viikkâm ooudâs ortodokslaž sieʹbrrkååʹdd tuâjjvueʹjjid ouddmiârkkân sosiaal media pääiʹǩ.

Pietarinen lij tuåimman Lappi ortodokslaž sieʹbrkååʹdd paappân 2011 rääʹjest. Suʹnne tuâjj sääʹmvuuʹdest lij samai määŋgpeällsaž. 

– Õhtt äʹšš tääiʹben, mâʹte jeeʹres vuuʹdin jânnamvuuʹdin, lij tõt mäʹhtt mij paapp ǩiččlõõttâp jieʹlled oummui aarǥâst, što mij tobddâp oummui jieʹllem, staarjõõzzid da siʹjji jurddi.

Rauno Pietarinen lij jiõčč aktiivlaž sosiaal media õõʹnni da vuäinn, što ortodokslaž tuâjj feʹrttai viikkâd tõõzz, koozz sieʹbrkåʹddneeʹǩǩ lie. Lappi mäddkååʹddest lie kuʹǩes kõõsk, da tõt lij vaikktam tõõzz, mäʹhtt še paapp tuâjj lij ouddnam.

– Kâʹl täk kõõsk lie pääkktam ooccâd ođđ tuâjjvueʹjjid, mâʹte tät virtuaalmättʼtõs da fiʹlmmjum mäʹttemsärnnmõõžž. Juõʹǩǩ päikka jeäʹp peäss da oummu jälste jeeʹres vuuʹdin, nuʹt tõnt mij ââʹnnep tõid vueʹjjid, mâiʹd ânnʼjõžäiʹǧǧ taʹrjjad. 

– Kâʹl tõt lij maaiʹlmveiddsânji pääccam. Sosiaal media ââʹnet sami jiânnai. Škooultõõzzâst sosiaal media lij õhtt jõnn äʹšš – ij pâi paappi da jaakân škooultõõzzin, peʹce puknallšem škooultõõzzin. Tõt (sosiaal media) lij pukid âânnmõõžžâst pirr suutk.

Pappi Rauno Pietarinen tubettaa
Govva: Rauno Pietarinen / Youtube -seeid
 

Fiiʹlmivuiʹm viikkâd ooudâs še säämʹkulttuur

Sosiaal media âânnmõš lij šâddan luândlaž tuâjjnääʹllen še ortodokslaž tuâjjpirrõõzzâst. Eʹčč Rauno mušttal, što sosiaal mediaaʹje raajjum fiiʹlm lie juätkk tõn tuõʹjju, mâiʹd sluužvin  pääcc mainsteǩani.

– Juõʹǩǩ neäʹttel ukkõõzzin päʹcce jiânnai saaǥǥ, mõõk jie čaaǥǥ ukkõʹsse. Tuʹtǩǩääm jiânnai leeʹd ceerkvest da ceerkvest mon laaʹvjam fiiʹlmid tueʹjjeed. Täid mon piijam nåkkam juʹrddjid da “seiddpuhttõõzzid” mâiʹd jiõm ǩeeʹrjtam ukkõʹsse.

Rauno Pietarinen Youtube -seidd. 

Oummu miõl lie čiõlggsânji  ǩiõssum nuõrttsääʹmkulttuuʹre, särnn Pietarinen. Õhtt peäglvumus “tubevideoin” lij nåkkam fiʹlmm, kååʹtt lij Čeʹvetjääuʹrest fiʹlmmjum.

– Pääiklaž kulttuur lij pâi tõt pukin vääžnjumus äʹšš ortodokslaž ceerkvest da tõt feʹrttai kuåsttad. Muu miõlâst meeʹst vuäitči jeänab kuåsttad tõt säʹmmlažvuõtt mij ceerkvest da mij vuäitčep jeänab äuʹǩǩeed sääʹmkulttuur mij tuâjast. Tõn mon jiõčč haaʹlääm viikkâd ooudâs täi fiiʹlmi pääiʹǩ.

Ortodokslaž ceerkav seillam säʹmmlai kõõskâst aaiʹji čõõđ

Pietarinen vuäinn, što vääžnʼjumus ääʹšš nuõrttsäʹmmlai kulttuur seeiltummšest lie ǩiõll da ortodokslaž ceerkav.

– Nuõrttsäʹmmla lie leämmaž ortodoksla pieʹll dohat eeʹǩǩed. Suõʹnnʼjel da nomadjieʹllem lie pääccam tuâkka, leâša ortodokslažvuõtt lij õinn jieʹlli äʹšš sääʹmkulttuurâst.

Tuâlʼjõž äʹrbbvuõđ jieʹlle sääʹmkulttuur päiiʹǩ õinn.

– Šiõǥǥ ouddmiârkk lij tõt mäʹhtt jieʹlim mõõnni čâhčča Njauddâm paalǥâskååʹdd pikalõõzzâst blouslõõvvmen puõccuid. Puõccuid priiskteš pââʹss čaaʹʒʒin da tõt lij muu miõlâst nåkkam äʹšš, kååʹtt lij välddam maall tuâlʼjõžääiʹjest da pohttam tõn tän peivva.

Varrasamosat: Sää´mjânnam

Váldoođđasat

Bivnnuhamosat

Varrasamosat

Muualla Yle.fi:ssä