Sápmi |

Gaskavahku almmustuvai raporta, mas ovdanbukto strategiija iešsoardimiid easttadeapmin

Vuosttas iešsoardineastadanbargoplána sápmelaččaid várás lea almmustuvvan. Plánas ovdanbukto 11 strategiija, main guovddážis lea buoridit sápmelaččaid psyhkalaš dearvvašvuođa ja eastadit iešsoardima.

iešsoardineasttadanraporta
Govva: Iešsoardineasttadanraporta

Raporta vuođđuduvvá dieđalaš dihtui ja dialogaide sápmelaččaiguin, geat barget iešsoardineastadanbarggu Sámis. Raporta lea dahkkon ovttasbarggus SÁNAG:a ja Sámiráđi gaskkal.

Plánabargu lea dáhpáhuvvan jagis 2015 gitta 2017 rádjai. Plána sisttisdoallá dieđalaš dieđu iešsoardima birra sápmelaččaid gaskkas ja ságastallamiid sápmelaččaiguin, geat áŋgiruššet iešsoardineastadeami barggus.

Psykologa Jon Petter Stoor (SÁNAG) lea hábmen raportta ovttas bargojoavkkuin. Bargojoavkkus ledje Gunn Heatta (SANKS), Heidi Eriksen (ovdalaš SÁNAG bargi), Gunn-Britt Retter (Sámiráđđi), Marja Katarina Påve Gaup (ovdalaš Sámiráđi bargi), Per Jonas Partapuoli (Sámiráđđi), Áile Javo (Sámiráđđi) ja Anne Silviken (SÁNAG). Bargu lea ruhtaduvvon prošeaktadoarjagiin NordRegio ja Norgga Sámedikki bokte. 

Strategiijat

Plána strategiijat leat hábmejuvvon dainna ulbmiliin, ahte galggašedje ollistit dan iešsoardineastadeamibarggu maid našunála stáhtat (Norga, Ruoŧŧa ja Suopma) fállet iežaset ássiide beroškeahttá čearddalašvuođa. Plána strategiijat čujuhit viissis hástalusaide sápmelaččaid gaskkas mat eai leat gokčojuvvon dan oppalaš barggus.

Plánabarggu áigumuš lea váikkuhit bidjat fokusa iešsoardinproblematihkkii sápmelaččaid gaskkas, juohkit dieđuid dutkangávdnosiid birra ja eará mearkkašahtti máhtu birra. Seammás lea áigumuš movttiidit digaštallat ja bargat dán fáttá ovdii sihke siskkobeale ja olggobeale sámi servvodaga. Strategiijat doibmet ávžžuhussan sidjiide, geat barget iešsoardineastadeami bargguiguin Sámis.

Olles raporttá sáhtát lohkat ruoŧagillii dáppe.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä