Sápmi |

Guhká vurdojuvvon doaibma – Vánhemat illudit, go mánáset besset sámegielat mánáidgárdái Gihttela gielddas

Sámeguovllu olggobeallái Gihttela Levii leat ásahuvvomin sámi mánáidgárdi. Boahttevaš mánáidgárdái ohcet dál oahpaheaddji ja de Gihttela ođđa sámemánáidgárdi lea válmmas rahpat uvssaidis boahtte čavčča. Vánhen illuda, go su mánát besset sámástit.

Aslak Niittyvuopio
Govva: Mikkal Morottaja / Yle

Sámegielat bearraša mánná ii vus máhte dadjat, man somá dat lea beassat hupmat sámegiela.

Juos buot manná bures, boahtte čavčča Gihttela gielddas Levi turismaguovddážis rahppojuvvo sámegielat beaiveruoktu.

Anni-Saara Kaarlela vuordá juo ođđa beaiveruovttu.

Leago somá go deike boahtá iežas beaivedikšobáiki deike Levii?

– Jua, dadjá Anni-Saara Kaarlela.

Geainna don lávet hupmat sámegiela dáppe?

– In mun muite.

Lávetgo dušše ruovttus hallat?

– Jua.

Anni-Saara Kaarlela
Anni-Saara Kaarlela. Govva: Mikkal Morottaja / Yle

Ohcet vel mánáidgárdeoahpaheaddji

Boahttevaš mánáidgárdái ohcet dál oahpaheaddji ja de Gihttela ođđa sámemánáidgárdi lea válmmas rahpat uvssaidis boahtte čavčča. Ohcánáigi mánáidgárddi oahpaheaddji virgái nohká ihttin bearjadaga 12. miessemánu diibmu 15.

Aslak Niittyvuopio
Aslak Niittyvuopio. Govva: Mikkal Morottaja / Yle

Soaitá goit leat, ahte dat ii leat nu álki gávnnat bargi. Aslak Niittyvuopio goittot sávvá, ahte buot manná bures ja su mánát besset sámástišgoahtit beaivegeahčus. 

– Galhan dat lea oalle somá, vaikko mii leat lahka sámeguovllu, muhto goittotge olu guhkkin eret. Ahte de dan sámegiela hallama fas sáhttá joatkit, dadjá Aslak Niittyvuopio.

"Go juvllat jorragohtet, de dat jorret"

Gihttela sámegielat mánáidgárdedoaimma plánen lea leamašan oalle guhkkes fidnu.

Saara Proksi
Saara Proksi. Govva: Mikkal Morottaja / Yle

Dálá dieđuid mielde ođđa mánáidgárdái livčče boahtimin ainnás guhtta máná. Levi sámegielat mánáidgárddis livččii sadji maiddái vuosttášluohkkálaččaid dikšui maŋŋel skuvlla.

Sámevánhen Saara Proksi lea duođai duđavaš dasa, ahte Gihttela gielda oažžui beaivedikšodoaibma johttui.

– Dat lea leamašan hui somá ja hastaleaddji ásahit dán ođđa doaimma deike, muhto lihkkus virgeolbmot leat hui positiivalažžat leamašan dás mielde dálán. De, go juvllat jorragohtet, de dat jorret. Dál mii leat lihkkus ožžon oalle guhkás juo, illuda Saara Proksi.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä