Sää´mjânnam |

"Hääʹsǩ vueiʹnned eʹpet taaurõõžžid!" – Jieʹnnipeiʹvv noori Čeʹvetjääuʹr jieʹnn prääzkjed õõutsââʹjest

Čeʹvetjääuʹr jieʹnnipeeiʹv prääʹznka leʹjje norrõõttâm jieʹnn ǩidd Âʹvvlest. Jieʹnnipeeiʹv leäi hääʹsǩ vueiʹnned vuäʹmm taaurõõžžid da smiõttâd tän peeiʹv jieʹnnvuõđ.

Sevettijärvellä juhlittiin äitienpäivää.
Govva: Ville Fofonoff / Yle

Čeʹvetjääuʹrest leäi jieʹnnipeiʹvven prääʹzniǩ, koozz leʹjje koččum še Âʹvvel puärrsipõõrtin jäälsteei oummid prääzkjed jieʹnnipeeiʹv.

Njauddâm sijddõhttõõzz tättai kåččad puärrsipõõrtin jäälsteei oummid mieʹldd jieʹnnipeiʹvv prääʹznka.

Čeʹvetjääuʹr škooulâst Njauddâm sijddõhttõõzz oummu taʹrjjee porrmõõžž puärrsid. Alggporrmõõžžan leäi kuurniǩ da vueiʹvvporrmõʹššan ǩeäʹrstõs da tõn ooll poʹrreš võl kääkk da juʹǩǩeš kaaʹff.

"Kuʹǩǩ ääiʹj jiõm leäkku tääiʹben jeälam"

Aanar kåʹdd leäi riâššâm jååʹđtõõzz buussin puärrsipõõrtin jälsteei oummid. Ulla Savolainen še puõʹđi Âʹvvlest buss mieʹldd Čeʹvetjäuʹrra prääzkjet jieʹnnipeeiʹv.

Ulla Savolainen
Ulla Savolainen Âʹvvlest. Govva: Ville Fofonoff / Yle

– Täʹbbe lij leämmaž tuõʹđi  šiõǥǥ peiʹvv, tuõʹđi šiõǥǥ peiʹvv! Mon tuʹtǩǩääm leeʹd tääiʹben. Tääiʹben lij šiõǥǥ veärr da puk tuʹtǩǩee leeʹd tääiʹben, rämmaš Ulla Savolainen.

– Muʹst lij leämmaž hääʹsǩ tääiʹben. Kuʹǩǩ ääiʹj jiõm leäkku tääiʹben jeälam.

Ouddlõs čeʹvetjäuʹrrneǩ Anastasia “Nasti” Sverloff jäälast juʹn puärrsipõõrtâst Âʹvvlest. Son še leäi toođvaž jieʹnnipeiʹvv reissu.

– Tääiʹben-han kâʹl lij leämmaž hääʹsǩes peiʹvv. Lij hääʹsǩ vueiʹnned oummid, koid iʹlla kuʹǩǩ ääiʹjest vuäinam.  

Nasti Sverloff
Nasti Sverloff. Govva: Ville Fofonoff / Yle

Ko pâi ij taarbšeʹči vuõltteed oummid 200 ǩilomettar tuäkka jiijjâs sooǥǥast, ǩiõlast da kulttuurâst

Jieʹnnpeiʹvv prääʹzniǩ mâŋŋa feʹrttai mõõnnâd eʹpet Âʹvvla, ko Čeʹvetjääuʹrest iʹlla puärrsipõrtt.

Helmi Haataja miõlâst Čeʹvetjäuʹrra heiʹvvjeʹči še måtamnallšem hoiʹddjemkääzzkõs, nuʹt ij taarbšeʹči vuõltteed oummid Âʹvvla 200 ǩilomettar tuäkka siʹjji jiijjâs sooǥǥast, ǩiõlast da kulttuurâst.

Helmi Haataja
Helmi Haataja. Govva: Ville Fofonoff / Yle

– Kâʹl leʹčči šiõǥǥ, jos tääiʹben leʹčči håʹt uuʹccab päiʹǩǩ, koon vuäitči ââʹnned puärrsab oummu, ko võl piʹrǧǧee jälsted jiõččineez leʹbe hoiʹddjeeivuiʹm. 

Saaʹmi vaarrouddooumaž Veikko Feodorooff miõlâst lij vääžnai, što Âʹvvel sääʹmpuärrsin lie vuäittmõš ââʹnned sääʹmǩiõl da prääzkjed õõutsââʹjest jeeʹres säʹmmlaivuiʹm.

Veikko Feodoroff
Veikko Feodoroff. Govva: Ville Fofonoff / Yle

– Muu miõlâst lij aivv šiõǥǥ äʹšš, što tät lij hoʹhssjum kaggâd pââjas da lie koččum oummu tiiʹǩ da Aanar kåʹdd lij mieʹldd., särnn Feodoroff.

– Sij jouʹdde tääiʹben jiijjâs täättas vuâstta vueʹlǧǧed tok Âʹvvla da sij pieʹsse ââʹn õhttsažtuâjast siʹjji jiijjâs oummid ǩiõččâd. Kâʹl tõʹst lij siʹjjid šuurab miârkktõs da miʹjjid še, kook tääiʹben jälstep da vueiʹnned siʹjjid. Sij vueiʹtte tääiʹben saǥstõõllâd kueiʹmm kueiʹmineez da mainsted jiijjâs jieʹnnǩiõlin.

Varrasamosat: Sää´mjânnam

Váldoođđasat

Bivnnuhamosat

Varrasamosat

Muualla Yle.fi:ssä