Sápmi |

Heahtá Márjjábeaivvit lahkonit

Heahtá Márjjábeaivvit lágiduvvojit 23.-26.3. Janne Näkkäläjärvi Johtti Sápmelaččat –searvvis muitala, ahte dán jagi šaddet veháš earálágán Márjjábeaivvit go ovdal.

heahtá márjjábeaivvit
Govva: Heahtá Márjjábeivviid ruoktosiidu

Heahtá Márjjábeaivvit lahkonit. Dat ordnejuvvojit 23.-26.3.

Johtti Sápmelaččat –searvvi Janne Näkkäläjärvi muitala, ahte dán jagi šaddet veháš earálágán Márjjábeaivvit go ovdal.

– Dat heargegilvvut maid mii lávet álo ordnet, nu mii dagaime stivrras mearrádusa, ahte dán jagáš Márjjábeivviin mii eat ordne ollenge gilvvuid. Dat lea danin, go EU komišuvdna lea dahkan diekkár mearrádusa, ahte ovdamearkka dihte Norgga bohccuid ii oaččo Supmii buktit. Ja go dat leat vel earenoamážit gieldán juste dan, ahte heargegilvvuide eai oaččo fievrridit herggiid.

– Nubbi rievdadus mis lea dán jagi dat, ahte go eai šaddan heargegilvvut, nu mii leat sirdán dán olles dáhpáhus báiki Heattá skuvlaguovddáža šilljui, ahte dat ii leat šat doppe Ovnnesjávrri gáttis ollenge.

"Vuoitái buorre bálkkašupmi"

Baicce dat ahte eai leat dat heargegilvvut, leat sii bidjan návccaid vehá eambbo njoarostallangilvvuide

Janne Näkkäläjärvi
Janne Näkkäläjärvi. Govva: Vesa Toppari/YLE

– Áigut dieinna lágiin vehá oažžut olbmuid deikke Heahttái ja mis leat buorit bálkkašumit ja muđuige mun jáhkán mis leat hui máŋggabealat kulturfálaldagat, oaivvilda Näkkäläjärvi.

Márjjábeivviin lei diibmá ja ovddit jagi njoarostangilvu, gos ledje lihkadeaddji stoalpput gosa galggai deaivat.

– Maiddái dán jagi mii áigut dieinna lágiin ordnet dien gilvvu ja mii leat bidjan hui buorre bálkkašumi goit vuoitái, muitala Näkkäläjärvi.

"Jáhkán šaddá miellagiddevaš"

Janne Näkkäläjärvi muitala, ahte vuosttaš bálkkašupmi lea njealjedákta muohtaskohter.

– Dat lea dieđusge vehá earenoamáš skohter. Maid mun lean gullán dáppe go leat muhtimat oastán diekkára, nu dat livččii hui buorre diekkár čakčavuoján, álgodálvve áigge. Dán skohtera sáhttá maiddái burgit ja dasto vuohon ođđasit hukset. Ahte dat lea goit buorre bálkkašupmi.

– Dán njoarostangilvvus nissonat ja dievddut leat seamma luohkás, muhto dat mátki gos nissonat njoarostit lea vehá oanehit go dievdduin. Mun jáhkán dies šaddá hui miellagiddevaš gilvu.

Almmuhusaid njoarostangilvui galgá sáddet 24.3. diibmu 16.00 rádjái čujuhussii: edaminna@gmail.com.

Oassálastinmáksu lea 50 € ja dat máksojuvvo báikki alde.

Sávvet gávttehasaid searvat

Näkkäläjärvi sávašii olu olbmuid ja eandalii gávttehasaid báikki ala.

– Miihan sávvat dieđusge, ahte olu olbmot boađále čuovvut dán Márjjábeivviid vuoiŋŋa. Ja dieđusge dan, ahte livčče olu gávttehasat, dat livččii diekkár sávaldat mis sápmelaččaide.

Heahtá Márjjábeivviid olles prográmma gávnnat dáppe.

Janne Näkkäläjärvi lei mielde Dearvva-sáddagis 10.3.2017.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä