Säämi |

"Kielâmuvrâ sämimuusik čuojâttem eestân" – Felgen orkester vuosmuš sämijuávkku Radio Suomi listoin

Felgen Orkester Jovnna -pittá lii vuossâmuš sämikielâlâš laavlâ, mii lii peessâm väldikodálij radiokanava A-muusikliston. Vuosâsuáittu puátá Radio Suomist pasepeeivi tme 13. maŋa.

Tuupa Records toimâttâshovdâ Jussi Isokoski.
Tuupa Records hovdâ Jussi Isokoski mieđeet, mon vaigâd sämimuusik lii finniđ väldikodálij radiosuáitun. Govva: Eljas Niskanen / Yle

Lii uáli epitáválâš, et sämilaavlâ čuájá Radiost Säämi ulguubeln. Tuupa Records toimâttâshovdâ Jussi Isokoski tiätá pyereest, mon vaigâd sämikielâlii muusik lii uážudiđ väldikodálii radiosuáitun.

– Monnii verd Yle kanavijn já Yle X:st já tiegárijn lii čuoijâm aalmugpeeivijn já eres teema-aašij ohtâvuođâst. Mut A-suáittulistoid já tiegárijd väldikode kanavijd ij lah lamaš piäsu. Ennuv lep tom faallâm, mut tuáistáážân tot lii lamaš sätinálásâš väldikode kanavijn, láittá Isokoski.

Felgen Orkester
Felgen orkester pittá Jovnna čuájá Radio Suomist vuosmuu tove pasepeeivi. Govva: Preassagovva
Isokoski ij vissásávt tieđe suujâ toos, mut sust lii kal noonâ arvâluš.

– Kielâääši mun luptiiččim vuossâmužžân, tanen ko eromâšávt onne mii sämimuusik teknisâš já puovtâdâslâš tääsi lep oovtâst pajedâm hirmâdávt. Tovle smiettim, ličij-uv suijân, ko mii pyevtittâs lii párnáikammuin, mut tääl ko lep peessâm ovdâskulij jyehi uásist, te jiem osko et tot lii innig tast kiddâ, sun arvâl.

Muusik ij koolgâ iärániđ liijkás ennuv listo eres muusikist

Radio Suomi pyevtitteijee Kirsi Väänänen mieđeet, et etnisâš tego meid sämmilâš muusik ij táválávt kulluu väldikodálijn radiolistoin. Sun muštâl, et liijkás eromâš muusik sáttá iärániđ liijkás ennuv eres pittái kooskâst. Felgen Orkester pittá kuittâg soovâi listoid mudâgávt.

– Ko kuldâlim uđđâ skiäruid, te ijhân taat laavlâ já taat skiärru pááccâm huámmâšhánnáá. Tot lii nuuvt fiijnes já ellee, mii suápá aaibâs moos peri, mut vala ko tast láá sämmiliih ivneh mieldi, te ton árvu vala paijaan, rámmoo Väänänen.

Varrasamosat: Säämi

Váldoođđasat

Bivnnuhamosat

Varrasamosat

Muualla Yle.fi:ssä