Sápmi |

LK: Beassážat čohkkejit fas sápmelaččaid oktii

Lapin Kansa Ságat lea čohkken beassášdáhpáhusaid, mat leat Suomas ja Norggas.

Felgen Orkestera Biehttar Hansen Ijahis Ijas
Felgen-joavku čuojaha beassážiid áigge Kárášjogas ja Guovdageainnus Govva: Jonne Järvinen / Yle

Beassážat leat árbevirolaččat olles girkojagi stuorimus allabassi. Suomas leat unnán fálaldagat beassážiid áigge ja dan dihte oallugat mannet Norgga beallái, Guovdageidnui ja Kárášjohkii. LK Ságat lea čohkken deháleamos sámi prográmmafálaldagaid oktii.

Eanodagas lágiduvvojit 48. geardde girko- ja klassihkalaškonsearttat Heahtá Musihkkabeivviid oktavuođas. Sotnabeaivve beassat gullát Heahtá girkus juoigi ja lávlu Anna-Reetta Niemelä.

Guovdageainnu beassášprográmma lea viiddis. Kulturviesus čájehuvvo skilleduorastaga Beaivváža mánáidteáhterbihttá Rievssatčivga.

Liet-lávlungilvu Guovdageainnus

Liet International 2017 lea Eurohpa unnitálbmogiid gilvu ja lágiduvvo iešguđet báikkiin Eurohpás. Dán jagi gilvvu beassá čuovvut Báktehárjjis. Lullisápmelaš Kalle Urheim doallá konsearta Thon hoteallas seamma eahkeda.

Guhkesbearjadaga lea mánáid juoigankonseartta Diehtosiiddas, árbevirolaš juoigankonseartta Báktehárjjis, gos loaiddasta Iŋgá-Máret Gaup-Juuso Tundra Electro -joavkkuinis. Eahketkonseartta lea Báktehárjjis. Doppe beassá guldalit sámi dovdoseamos rap-artisttaid Áilu Valle, Amoc ja Slincraze.

Sámi Grand Prix -gilvu lávvardaga Báktehárjjis

Beassášlávvordaga lágiduvvojit heargevuodjingilvvut Báktehárjji stádionis. Eahkes lea árbevirolaš Sámi Grand Prix 2017 juoigan- ja lávlungilvu ja dan maŋŋel lea konseartta Báktehárjjis, gos čuojahit Elle-Márjá Eira, Sofia Jannok ja Felgen.

Jos it beasa geahččat Beaivváš -teáhtera Rievssatčivgga skilleduorastaga, dat čájehuvvo fas ođđasit sotnabeaivve. Duodjeinstituhtas lea duodje- ja dáiddačájáhus juohke beaivve beassážiid áigge. Maiddái Diehtosiiddas lea govva- ja duodječájáhus.

Felgen čuojaha Kárášjogas duorastaga

Kárášjogas leat skilleduorastaga heargevuodjingilvvut ja eahkes konseartta, gos čuojaha beakkán sámi joavku Felgen. Sofia Jannok ja Kalle Urheim leaba guhkesbearjadaga lávddi nalde valáštallanhálles. Beassášlávvordaga lea skohtergilvu KaraX ja ja Rolffa čuojaha eahkes ovttas earret eará Mollet -joavkkuin, Ágyn ja Bitin.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä