Sápmi |

Luobbal Sámmol Sámmola girji Davvisámi báikenamat almmuhuvvo lávvordaga – Ávvuda seammás 80. jagi šaddanbeaivvis

Ohcejohkalaš dutki ja giellačeahppi Luobbal Sámmol Sámmol, Samuli Aikio lea geargan bargat 80. jagi áigge olu. Dál ČálliidLágádus almmuha Aikio girjji Dávvisámi báikenamat.

Luobbal Sámmol Sámmol, Samuli Aikio.
Luobbal Sámmol Sámmol, Samuli Aikio. Govva: Anneli Lappalainen / Yle

Ohcejohkalaš Luobbal Sámmol Sámmol, Samuli Aikio lea dutki, giellačeahppi ja olu eará. Ihtin Lávvordaga ČálliidLágádus almmuha su Davvisámi báikenamat girjji Ohcejogas ja seammas Aikio ávvuda iežas 80 jagi beaivvi. Muhto ovdal dán son lea geargan bargat olu earáge.

– Muhto dieđusge jagiid guhkkodatge leat dieđus šattan veaháš čállosat, váikkeba juste gielladutkamuša ja historjjá dutkamuša olis ja muhtun folklore girjjit maiddai, maid mun ráhkadin muhtuma maiddai eamitrohkkiin ovttas, lohká Aikio

Aikio lea addán olggos máŋggaid girjjiid ja várra dovdoseamos dain lea Girdinoaiddi bárdni, man son lea čállán eamitrohkiinis ja mii lea jorgaluvvon maiddai polskagillii. Son lea čállán maid oanehut čállosiid iešguđetlágan čoakkáldagaide.

– Gal dieđus sierranas čállosat leat várra juo moattit čuođit, muhto olles girjjiid viehka uhccán lihkká.

Artihkkal joatkkašuvva gova vuolde.

Girdinoaiddi bárdni -girjji polskagielat jorgalus.
Girdinoaiddi bárdni -girjji polskagielat jorgalus. Govva: Anneli Lappalainen / Yle

Bargan báikenamaiguin juo guhká

Girjái man Aikio ihtin olggosaddá lea son čohkken dieđuid, maid son lea juo guhká čoaggán. Báikenamaiguin Aikio lea bargan juo guhká. Studerenáiggis son álggii juo čoaggit báikenamaid.

– Na iešalddes mun lean bargan gal dieđus oačču dadjat guhkáge ja smiehtadan, dieđusge mun lean čoaggán namaid juo gitta studerenáiggi rájes, muhto maiddai smiehtadan daid vuođuid viehka guhkáge, Aikio lohká.

Girjji almmustahttindilálašvuođa oktavuođas Aikio ávvuda riegádanbeaivvis. Sus lei earenomáš jurdda dilálašvuhtii.

– Na muđui ii leat nu earenomáš dovdu, muhto mus lei veahá dakkár gudneáŋgiris jurdda, ahte beasan doallat šaddanbeaifeasttaid nu, ahte mun attašin skeaŋkan gussiide iige sii buvttašii baicce munnje dárbbašmeahttun šlámboriid. Dat ii leat áibbas lihkostuva danin, go dat girji veaháš maŋŋona, Aikio muitala.

Geahčča áššis eanet Yle Ođđasiin, Yle TV1-kanálas diibmu 16:45.

Davvisámi báikenamat -girjji almmuhandilalašvuohta lea lávvordaga 13.5 diibmu 16.00 Ohcejogas Deatnu restoráŋŋas. ČálliidLágádus fállá káfe ja gáhkuid.

Artihkalis rievdaduvvon bajilčála. Ovdal lei Luobbal Sámmol Sámmol olggosaddá Davvisámi báikenamat –girjji lávvordaga – Ávvuda seammás 80. jagi šaddanbeaivvis.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä