Sápmi |

Luondduguoli ávkkástallan stuorra gievkkaniin ja restoráŋŋain lea vejolaš - gáibida ovttasbarggu

Lagašbiepmu nu mo guovllu guoli geavaheamis leat buorit vásihusat Soađegilis. Unna fitnodagain fas sáhttá leat váttisvuohta fidnet guoli.

Jávreguollebivddus Ohcejogas.
Jávreguollái livččii maid dárbu restoráŋŋain. Govva: Yle / Jouni Aikio

Soađegili gielddas leat buorit vásihusat lagašbiepmu geavaheamis. Gielda mearridiii jagis 2012 álggahit iežas doaibman lagašbiepmu ávkkástallama. Juo golggotmánus 2014 rahppojuvvui gieldda guovddášgievkkan.

Doaibma ii álgán goittot váttisvuođaidhaga.  – Álggos sii gárte oahpahallat biepmoskáhppoma, muitala gieldda bioekonomiijakoordinahtor Marjaana Aarnio.  Son lei boazo- ja guollebeivviiin muitaleamen mo Soađegili gielddas barget lagaš biepmu geavahemiin.

Almmolaš báikkiid biebmoskáhppomage mudde nu daddjon skáhpponláhka (hankintalaki). Soađegilis leat oahppan dan, ahte okta viiddisge gielda lea menddo unna doaibmi dalle go hállojuvvo lagašbiepmus. – Ferte duddjot viidásut fierpmádaga mas leat lagaš gielddat ja oppa eatnangoddi mielde, dadjá Marjaana Aarnio.

Soađegili gieldda roahkkadis doaibma lagašbiepmu ávkkástalllamis lea veahkehan luondduealáhusa doaibmama. Boazo- ja guollebeivviin muitaluvvui, ahte guovddášgievkkan geavaha valjis Soađegilis dahje ránnjágielddaid boahtán guolli ja bierggu nu go maiddái šattuid ja murjjiid.

Jávreguoli váttis fidnet Ohcejogas - danin ii oidno restoráŋŋa biebmolisttus

Ohcejohkalaš fitnodatdoalli Petteri Valle jáhkká, ahte luondduguollái livččii johtu sin restoráŋŋas. Eandalii dálvit lea goittot váttis doallat biebmolisttus jávreguoli. Danin rávdu, čuovža ja soavvil oidno hárve listtuin.

– Dálvit lea váttis go mii eat lágalaččat fidne iežamet restoráŋŋii guovllu guoli. Dál leat juoga veardde fidnen Anáris, muhto doppege eanaš guolli manná stuorit fitnodagaide. Dákkár uhca fitnodagas nu go mis de lea váttis fidnet jávreguoli, dálvebivdit eai gávdno Ohcejogas, árvala Petteri Valle.

– Nugomat Ohcejohkii galggašii fitnašuvvat guollegieđahallanhálla, gos vejolaš bivdit beasašedje čollet guliid. De lea vel čoavdit dat mo fidnet daid guliid doppe jávrri luhtte jorbbasin gieđahallanhállái.

Soađegili ovdamearkka vuođul sáhtášii duddjot ovttasbarggu

Petteri Valle jáhkká, ahte maiddái Ohcejogas sáhtášii juoga muddui váldit málle Soađegili lagašbiepmodoaimmas. Guollečáziid dikšumiige das livččii mearkkašupmi jus guovlllu guolli geavahuvvo ávkin.

– Mun oainnan, ahte dáppe sámeguovllus mii galgašeimmet ovddidit jurgada nu, ahte gielda livččii dat njunuš guhte pláne dán doaimma. Dehalaš livččii ovttasbargui fidnet maiddái guolástangottiid fárrui. Mis lea nu unnán guolásteapmi jávrriin dáppe, livččii buorre ordnet daid jávrriid. Mu mielas guolástangottiin livččii juo geatnegasvuohta vuolgit diesa. Fitnodagat galggašedje maid leat mielde dás, livččii dákkár viidásut riekkis, dadjá Petteri Valle.    

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä