Sápmi |

Mánát besse oahpásmuvvat Jesusii máinnasbálgás Avvilis

Via Crucis - Ruossa geaidnu -beassášmuitalus lea oalle bivnnut Suoma searvegottiin. Das muitaluvvo Jesusa gillámušain guhkesbearjadaga ja de bajásčuožžileamis beassášbeaivve. Avvila girkui lei huksejuvvon máinnasbálggis mas mánát besse oahpásmuvvat dán dološ muitalussii.

Video: Via Crucis Ruossa geaidnu pääsiäiskertomus
Video

Mánát ledje boahtán Avvila girkui gullat dan, mo Jesusii geavai sullii 2 000 jagi dassái. Ovtta sajis eai goittotge gártan čohkohallat guhkes áiggi, go girku bargit ledje ráhkadan albma máinnasbálgá.

Jari Linjama
Jari Linjama. Govva: Eljas Niskanen / Yle

– Sii duođaige oidnet dan, ahte makkár lei dat Jesusa ruossageaidnu ja dat jápmin ja bajás loktaneapmi, muitala Anára searvegotti kántor Jari Linjama.

Moadde čuođi olbmo leat jo oaidnán bálgá. Mánát ledje movttegat go besse dákkára vásihit.

– Mánát leat gal liikon olu. Sii leat movtta ja liikojit das, ahte mus leat dákkár biktasat badjelis ja ná, muitala Linjama.

Sávašii šaddat árbevierrun

Bálgás leat olu áššit maid beassá imaštallat. Moadde ášši báhce goittotge mánáid mielaide buorebut go eará áššit. Joona Siivonen muitala, ahte Jesus bázii buoremusat su millii. Nevala oarbinaččaid Saammâla ja Anni-Saara mielas áse ja ásiin riiden bážii  buot buoremusat millii.

Via Crucis Ruossa geaidnu pääsiäiskertomus
Govva: Eljas Niskanen / Yle

Jari Linjama mielas lea fiinna ášši, ahte girkuge geavaha ođđa vugiid muitalit dain áššiin. Bálgá ráhkadeamis lei garra bargu, nuba Linjama sávvá, ahte beassášmuitalusa oaidnit maiddái boahtte jagi.

– Mun sávan, ahte dát ii leat áidna geardi, baicce ahte dás šattašii árbevierru go lei nu garra bargu, ahte boahttevuođas boahtte jagi dát lea jo oalle olu álkit ráhkadit ja stellet oba hommá, dadjá Linjama.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä