Sápmi |

Meahciráđđehusa Saarijärvi stohpu meidnii buollát – eiseválddit dáhttot dolastallat várrugasat

Meahciráđđehusa Saarijärvi stohpu Giehtaruohttasis meidnii buollit jurddašmeahttun dola gieđahallama dihte. Muonio čáskadanhoavda Pekka Väliheikki dadjá, ahte dollasajit leat buori ortnegis, muhto daid ferte máhttit geavahit riekta.

Gova ávdinstohpu ii laktás dáhpáhussii. Govva: Tapio Nykänen

Meahciráđđehusa Saarijärvi stohpu Giehtaruohttasis meidnii mannan lávvardaga buollit jurddašmeahttun boaldinmuoraid seailluheami ja dola gieđahallama dihte. Muonio čáskadanhoavda Pekka Väliheikki muitala mo dáhpáhus čielggai.

– Doppe ledje leamašan vánddardeaddjit Saarijärvi ávdinstobus, dan bealde man várret ja lohkkadit. Sii ledje dasto ovdal go vulge, bidjan muoraid menddo lahka kamiinna. Dat álge suovastit, muhto eai buollán. Lihkus doppe lei doaibmi buollinváruheaddji, nugo mearrádusaid mielde galgá leatge.

– Dasa deaivvai meaddeljohtti ja gulai dan buollinváruheaddji jiena ja havssii suova, muhto ii beassan stobu beallái go uksa lei lohkkas. Son de dagai heahtealmmuhusa ja dasto gohčojuvvui Gilbbesjávrri čáskadanjoavku báikki ala. Gilbbesjávrri giliguovddážis ja čáskadanstašuvnnas lea nuppelot kilomehtera dohko Saarijärvi stohpui, ahte iihan dohko beasa go gielkkáin. Ja dasto vižžui doppe Gilbbesjávrri oahpistanguovddážis čoavddage vai ii dárbbaš biđget uvssa. Besse dohko doarvái árrat lihkus ja gerge guoddit daid cahkki muoraid olggos.

"Buorit dollasajit"

Pekka Väliheikki oaivvilda, ahte stohpui livččii sáhttán geavvat funet.

– Jos ii livčče leamašan buollinváruheaddji ja jos ii livčče leamašan meaddeljohtti, livččii Saarijärvi stohpui geavvan dán dáhpáhusas vehá funet. Lihkus dát doibme. Meahciráđđehus lea gal fuolahan bures, ahte rusttegat ledje buori ortnegis, nugo dat galget leatge.

Väliheikki oaivvilda ahte dollasajit leat buori ortnegis.

– Doppehan leat hui buorit dollasajit. Oktii jagis miinai dahkat buollindárkkistusa ovdal hoahpumus čuoiganbaji doppe duoddaris. Kamiinnat gal leat buorre ortnegis, nugo dánge dáhpáhusas lea čielggas, ahte geavaheaddjis ii leat leamašan diehtu, mo dollasaji galgá geavahit. Ii dollasaji báldii liiggás lahka galgga bidjat muoraid goikat. Dábálaččat dat lea nu, ahte dollasajit gal doibmet go fal máhttet geavahit dieid riekta.

Väliheikki mielas livččii buorre, jos stobuin livččii juogalágán čuvgehus ja rávven das, mo dollasajiid geavahit.

– Muhto dollasaji geavaheapmi lea álo dan geavaheaddji ovddasvástádus. Galggašii dan veardde leat dat dáidu, ahte go duohko meahccái vuolgá, nu diehtá mo dollasajiid geavahit ja mii lea dorvvolaš. 

Pekka Väliheikki lei mielde Dearvva-sáddagis 15.3.2017.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä