Sápmi |

Niillas Holmberg lea Jagi sápmelaš 2016

Bálkkašupmi geigejuvvui Helssegis lávvardaga Etnosoi!-dáhpáhusas.

Jagi sápmelaš 2016 Niillas Holmberg, ii ieš lean Helssegis váldimin vuostá nammadeami. Son goittotge sáddii dáhpáhussii videodearvvahusa.
Jagi sápmelaš 2016 Niillas Holmberg, ii ieš lean Helssegis váldimin vuostá nammadeami. Son goittotge sáddii dáhpáhussii videodearvvahusa. Govva: Helga West / Yle

Dáiddár Niillas Holmberg lea Jagi sápmelaš 2016.

Niillas Holmberg lea šaddan dovddusin nu diktačállin, musihkkárin, neavttárin go sámiid rivttiid bealušteaddjin. Dáid ánssuid ovddas son bálkkašuvvo Jagi sápmelažžan jagis 2016. Holmberg lea Ohcejogas eret ja orru dál Johkamohkis.

– Niillas Holmberga davvisámegielat girjjálašvuohta ja musihkka leat mearkkašahtti kulturdahku. Sámegiel girjjálašvuohta ja musihkka lea almmustahtton oalle unnán, ja nu Holmberg mánga diktagirjji ja skearru leat mearkkašahtti vugiin lasihan sámi girjjálašvuođa- ja musihkkafálaldaga.

– Dáidagiinnis Holmberg lea čalmmustahttán sámekultuvrra maiddái váldoálbmogii, ja viidát Suoma rájiid olggobealde miehtá máilmmi, Jagi sápmelačča válljen sámeservviid ovddasteaddjit lohket.

“Holmberg ii bala váttis fáttáin”

26-jahkásaš Niillas Holmberg lea almmustahttán vihtta diktagirjji, mat leat jorgaluvvon badjel logi sierra gillii.

Musihkkárin Holmberg lea čuojahan iešguđet joavkkuin ja iešguđet musihkkastiillaid. Holmberg lea maiddái neaktán teáhterlávddiin ja ovdamearkka dihte sámi mánáidprográmma Unna Junnás. 

Jagi sápmelaš -bálkkašumiin hálidit giitit Holmberga maiddái su barggus sámiid vuoigatvuohtadili bealis. Holmberg lea buktán ovdan sámiid sajádaga máŋgga oktavuođas ja lasihan diđolašvuođa sámiid rivttiin maiddái váldoálbmoga gaskkas.

– Holmberg ii leat gárván váttis fáttáidge, muhto lea baicca ávkkástallan mediaid sámiid vuoigatvuođaid ovddideamis, válljenjoavkkus lohket.

Niillas Holmberg
Govva: Tarmo Lehtosalo
Niillas Holmberg lea davvisámegielat dáiddár. Son lea gielalaš ovdagovvan sámemánáide ja nuoraide, City-Sámit-searvvi ságadoalli Inka Musta dadjá. Musta doaimmai Jagi sápmelačča válljen joavkku ságadoallin.

– Holmberg lea sámegiel dáiddárin dehálaš ovdagovva eandalii sámemánáide ja -nuoraide, geat besset oaidnit iežaset kultuvrra ja giela oidnosis ja nu, ahte dat atnojuvvo árvvus, Musta dadjá.

Ovttaskas olbmot leat ožžon evttohit Jagi sápmelačča

Jagi sápmelačča válljemii oassálaste gávcci sámesearvvi: City-Sámit, Bárbmu, Johtti Sápmelaččat, Mii, Sámi Siida, Suoma Sámi Nuorat, Vuohču Sámiid Searvi ja Oulu Sámit.

Dát gávcci searvvi ásahedje válljenjoavkku, mas ledje ovddasteaddjit iešguđet sámesearvvis.

Válljenjoavku ordnii rabas álbmotjearahallama neahtas ja ovttaskas olbmot besse evttohit Jagi sápmelačča. Evttohusat bohte sullii 100. Dáid evttohusaid vuođul válljejedje Holmberga.

Inka Musta Helssegis gáktebeaivve 2015.
City-Sámit-searvvi várreságadoalli ja Jagi sápmelaš - válljenjoavkku ságadoalli Inka Musta. Govva: Helga Siljander / Yle
– Niillas Holmberg bargu sámekultuvrra, -dáidága ja sámiid rivttiid ovdii lea dahku, mas sámesearvvuš haliida su Jagi sápmelaš -bálkkašumiin giitit. Seammás doarjut su buori barggu ain ovddosguvlui, válljenjoavkku ságadoalli Inka Musta lohká.

Jagi sápmelaš-bálkkašumpi juhkkojuvvui dál nuppi háve

Jagi sápmelaš -lea bálkkašupmi, man oaivegávpotguovllu sámesearvi City-Sámit rs juohká dál nuppi háve.

Bálkkašumiin hálidit roahkasmahttit sápmelaččaid gáhttet iežaset kultuvrra ja giela, sirdit dan čuovvovaš sohkabuolvvaide ja lasihit váldoálbmoga diđolašvuođa sámiid birra.

Bálkkašumpi geigejuvvui Helssegis lávvardaga Etnosoi-dáhpáhusa oktavuođas. Bálkkašumi geigii riikabeaiáirras já ovddeš vehádatáittardeaddji Eva Biaudet.

Vuosttas Jagi sápmelaš -bálkkašumi oaččui jagis 2015 anárlaš sámegiela lektor Outi Länsman.

Sauli Niinistö, Outi Länsman ja Jenni Haukio
2015 Jagi sápmelažžan válljejuvvon Outi Länsman ovttas dásseválddi presideanta Sauli Niinistöin ja rovvá Jenni Haukioin. Govva: Juha Länsman

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä