Säämi |

Njuárgám kááijumlágádâs finnij uđđâ išeniävu suvčâgâm ulmui várás

Säämist sáttá tuođâštiđ nelji iveääigi pirrâmpeeivi siisâ já meecijn sehe tuoddârijn ko jotá, te sijvo sáttá fakkist muttuđ varâlâžžân. Oululâš utkee raahtij niävu, moin sáttá piäluštiđ jiegâid etitijlijn.

Video: Teijo Siekkinen čáittá suu uđđâ utkos, Arctic Rescue Bag
Video

Säämist šoŋŋâ lii motomin aavâštmettum. Tuoddârist ko vuájá kiälháin, te sijvo sáttá muttuđ paifakkist peeivipaštust muotâpurgân.

Oululâš irâtteijee já utkee, Teijo Siekkinen lii utkâm niävu, moin šeštiđ jiegâid - Arctic Rescue Bag, lieggejeijee seehâ suvčâgâm ulmui várás. Jurduu sun finnij jieijâs feeriimijn.

Teijo Siekkinen
Govva: Miikkal Morottaja / Yle

– Idea šoodâi tääbbin Njuárgámist, ko muáddi ive tassaaš tábáhtui kiälkkápärtti, mast kulmâ ulmuu ruáppánij Pulmankijäävri jieŋâ oolâ. Lam jieš kuohtii lamaš muotâstoormâst, te tiäđám et enâdâh muttoo love minuttist já jis puoh ij lah oornigist, te šadda eeti, muštâl Siekkinen.

Lii tehálâš finniđ kolmum ulmuu jotelávt lieggâsân

Seehâ puáhtá stelliđ veikkâ moottorkiälhá riehân já seehâ liegâsvuođâ puáhtá stelliđ oovtâ ceehi tärhisvuođâin.

Njuárgám kááijumlágádâsâs asemamiäštár Jorma Haapala tiätá, et smaavâ ääših sättih vaikuttiđ piäluštuvá-uv olmooš vâi ij.

– Koolmâs lii viärráámus vajalâš mist. Já ko finnee vuosâiše jotelávt, te meid pyeccee puáránem jotásmuvá, Haapala iätá.

Jorma Haapala
Jorma Haapala Njuárgám kááijumlágádâsâst lii mielâst uđđâ niävust. Govva: Mikkal Morottaja / Yle

Veikkâ seehâ ovdedemkoloh lijjii paijeel 10000 eurod, te utkee haalijd markkânistem lasseen toohâđ pyeri meid siärváduvvân. Sun halidij skeŋkkiđ jieččân hutkos Njuárgám kááijumlágádâsân. Asemamiäštár vaaldij läähji mielâsávt vuástá

– Arvâlim, et sun lii puáttâm čäittiđ teehin puovtâ, mut taat lâi olâttâs. Táválávt puovtâoovdânpyehteeh, eteh et uážžu uástiđ, mut sun olâttij já skeŋkkii mijjân tággáár uđđâ hitech-puovtâ te takkâ sunjin, Haapala kijttá utkee.

Varrasamosat: Säämi

Váldoođđasat

Bivnnuhamosat

Varrasamosat

Muualla Yle.fi:ssä