Sápmi |

Nuorgam Deanu soahpamuševttohusas: Ii veahket go smiehttagoahtit rivttes váidinorgána

Riikkabeivviid eana- ja meahccedoallováljagoddi ii olus rievdádan Deanu soahpamušárvalusa go 9.3. gearggai smiehttamušainis. Veahčatnjárgga guolastangotti ságadoalli Anne Nuorgam muitala leat suhttan smiehttamuššii.

Jietna: Anne Nuorgam
Jietna

Riikkabeivviid eana- ja vuovdedoallováljagoddi ii dahkán stuorra rievdádusaid Deanu soahpamušárvalussii. Eana- ja meahccedoallováljagoddi gearggai smiehttamušainis 9.3.

Veahčatnjárgga guolastangotti ságadoalli Anne Nuorgam muitala leat suhttan dán smiehttamuššii.

– Galhan mun lean oalle behttohallan ja njuolgut jo suhttan. Go iešalddes dán eana- ja meahccedoallováljagotti cealkámušas bođii čielgasit ovdan ahte Suoma vuođđolága paragráfa, mii suodjala sápmelaččaid vuoigatvuođaid, lea guoros paragráfa. Váljagotti ákkastallá, ahte Suomas ii sáhte sápmelaččaid vuoigatvuođaid suodjalit, go ii gávdno meroštallan ahte gii lea sápmelaš. Dušše sámedikki válggaid várás gávdno meroštallan, muhto muđuid ii gávdno. Danin ii sáhte suodjalit sápmelaččaid vuoigatvuođaid go ii gávdno meroštallan, man bokte meroštallat gii lea bivdosápmelaš ja gii ii.

Nuorgam oaivvilda, ahte soahpamuševttohus ii oro gopmáneamen riikkabeivviin.

– Gal dat orru leamen nu, ahte dát Deanu soahpamuš manná čađa Suoma riikkabevviin, danin ahte ráđđehusa lahtuin lea eanetlohku. Ja de dan maŋŋá das ii veahket eará go smiehttagoahtit mii lea dat rivttes váidinorgána. Leago dat Eurohpá olmmošvuoigatvuođaid duopmostuollu,Ovttastuvvan našuvnnaid soahpamuškomitea vai leago dat Eurohpá uniovnna duopmostuollu. Die leat dat golbma molssaeavttu mat mis leat.

"Leago dát šat riektestáhta"

Anne Nuorgam oaivvilda, ahte Suomas eai suodjal duođalaččat sápmelaččaid vuoigatvuođaid.

– Na mun oainnán Suoma bealde dat oaivvilda dan, ahte go dahkkojuvvo láhka mainna viggat suodjalit sápmelaččaid kultuvrra nugo boazodoalu dahje meahcásteami, de das ii sáhte maidege čállit sápmelaččaid birra danin, ahte Suomas ii gávdno duođalaš sápmelaččaid vuoigatvuođaid suodjaleapmi.

Nuorgam mielas politihkkarat leat dihtomielalaččat velaheamen sápmelaččaid, jos Suoma riikkabeaivvit dohkkehit Deanu soahpamuša.

– Sin iežaset vuođđoláhkaváljagotti, mii addá cealkámušaid das, ahte rihkkugo dát soahpamuš olmmošvuoigatvuođaid vai ii, dadjá čielgasit ahte dát soahpamuš rihkku. Muhto goittotge jos dat jienastit dihtomielalaččat vuostá, dalle mun in dieđe ahte makkár stáhtas mii eallit. Leago dát šat riektestáhta vai ii, sápmelaččaid ektui.

Olles eana- ja meahccedoallováljagotti smiehttámuša sáhttá lohkat suomagillii dáppe .

Anne Nuorgam lei mielde Buorre iđit Sápmi –sáddagis bearjadaga 10.3.2017.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä