Sápmi |

Oaččui olu jienaid, ii dattege beassan váldostivrii

Ruoŧŧelaš álbmotbellodaga ovddasteaddji Tero Harju Anáris oaččui gielddaválggain 68 jiena. Son ii goittotge beassan váldostivrii, go veardidanlogut ledje menddo unnit.

Jietna: Tero Harju
Jietna

Tero Harju lei áidna Ruoŧŧelaš álbmotbellodaga evttohas Anára gielddas. Son oaivvilda, ahte válggat manne nuppe dáfus bures, muhto nuppe dáfus funet.

– Jienat bohte aivve bures, muhto čađa in dattege mannan. Dan dáfus bázii gal unohastit.

Harju oaččui gielddaválggain 68 jiena.

– Rehkenasten duos eahkedis, ahte livččii 110 jiena gáibidan dat čađa mannan.

"Bellodatválljen sáhtii váikkuhit"

Harju oaivvilda, ahte bellodatválljen sáhtii váikkuhit muhtin jienasteddjiide, muhto son ii jáhke, ahte čađabeassan lea gopmánan dasa. Son goittotge mieđiha, ahte jos RÁB listtus livčče leamašan eanet olbmot, nu veardidanlogut livčče leamašan stuoribut.

– Náhan dat livččii mannan. Livččii leamašan veháš álkit geaidnu dan mielas, jos livčče leamašan eanet olbmot listtus.

Tero Harju muitala, ahte jos livččii beassan váldostivrii, su temát livčče leamašan boaittobeali giliid eallindili buorideapmi, skuvlenvejolašvuođat eandalii sámegielaid oasil, ja gieldda áššit ja gieldalaččaid buresbirgejupmi.

"Bázii buorre dovdu"

Tero Harju muitala, ahte sáhtášii boahttevuođas iskat fas gielddaválggain váldostivrii.

– Gal dás dál bázii dakkár buorre dovdu, ahte manneba ii. Ja dál jos vejolaččat man nu lávdegoddebáikki oaččošii, nu datgehan livččii jo oalle buorre. Beasašii muhtin láhkái váikkuhit mearrádusa dahkamii.

Harju muitala vuosttaš molssaeaktun livččii čuvgehuslávdegoddi.

Tero Harju oaččui jienaid juohke jienastanguovllus Anára gielddas, nappo Anáris, Avvil, Gápmasis, Njellimis, Čeavetjávrris ja Dearpmážis.

– Galhan dat orru, ahte máŋgga sajis leat boahtán jienat. Dathan lea hui fiinna ášši, ahte ii leat dienu juohkásan dušše muhtin sajiide. Dáthan lea oalle positiivvalaš gal.

Tero Harju lei mielde Dearvva-sáddagis 10.4.2017.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä