Sápmi |

Odne lea riikaviidosaš Álbmotmusihka beaivi – dehálaš čalmmustahttit oaivvilda musihkar

Odne lea riikaviidosaš álbmotmusihka beaivi. Beaivvi ulbmilin lea čalmmustahttit álbmotmusihka ja álbmotdánsuma.

kansanmusiikki
Odne lea vuosttaš Álbmotmusihka beaivi. Govva: Kansanmusiikin ja Kansantanssin Edistämiskeskus (KEK)

Odne lea vuosttaš geardi go riikaviidosaš Álbmotmusihka beaivi ordnejuvvo Suomas. Beaivvi ulbmilin lea čalmmustahttit álbmotmusihka ja álbmotdánsuma sihke unnit ja stuorit dáhpáhusaid bokte miehtá Suoma.

Beaivvi koordinere Álbmotmusihka ja álbmotdánsuma ovddidanguovddáš (KEK) ja dat leage hástalan olbmuid ja doaibmiid ordnet álbmotmusihkkii laktaseaddji prorámma.

Dehálaš beaivi

Álbmotmusihkka leamašan álot musihkar ja musihkaoahpaheaddji Anna Näkkäläjärvi-Länsman váimmu guovdu. Son illuda go álbmotmusihka ná čalmmustahttojuvvo.

Anna Näkkäläjärvi-Länsman
Anna Näkkäläjärvi-Länsman Govva: Mikkal Morottaja / Yle

– Dat gal lea álot leamašan mu jiellat musihkka ja lean guldalan dan jo mánnávuođa rájes. In dieđe mii das lea, leago lávlumis ja šuoŋain juoga,muhto dat lea mu bealljái čáppat. Lea hui buorre, ahte mii leat ožžon dakkár beaivvi. Álbmotmusihka šaŋŋeris leat hui olu čeahpes lávlut ja musihkkárat, mat eai gullo váldomediain. Sávvamis dat álbmotmusihka joavkkut ja artistat ožžot dán beaivvi bokte dasto ođđa guldealeaddjiid ja fuopmášumi, dadjá Anna Näkkäläjärvi-Länsman.

Some bokte čalmmustahttit

Álbmotmusihka ja álbmotdánsuma ovddidanguovddáš sávváge, ahte ovttaskas olbmot čalmmustahttet álbmotmusihka beaivvi; vaikko dušše fal some bokte ja máidnut iežas mielamiel álbmotmusihka. Dan áigu dahkat maiddái Anna Näkkäläjärvi-Länsman ovttas iežas musihkkaoahppiiguin.

– Mun jáhkán, ahte mii ovttas studeanttaiguin dahkat juoidá somes. In dieđe vel maid, muhto čalmmustahttit some bokte dan Álbmotmusihka beaivvi. Dađi bahábut mis ii leat dál makkárge konsearta, muhto min Sámi musihkkaakademiija some gánniha čuovvut, dadjá Anna Näkkäläjärvi-Länsman.

Álbmotmusihkka beaivvi prográmma ja dáhpáhusaid gávnnat dáppe www.kansanmusiikki.fi.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä