Sápmi |

Ohcejoga searvegotti nuoraidbargi Juha Reinola bálkkašuvvui

Ohcejoga searvegotti nuoraidbargi Juha Reinolai lea mieđihuvvon Girku mánáid- ja nuoraidbarggu gudneplakáhta. Gudneplakáhta mieđiha Girkoráđđehusa Bajásgeassin ja bearasáššit –ovttadat.

Juha Reinola
Govva: Päivi Aikasalo

Plakáhta mieđiheami ággan lea guhkesáigásaš ja ánssolaš bargu girku mánáid- ja nuoraidbarggu suorggis. Plakáhta mieđihuvvo oktii jagis ja Juha Reinola lea dán jagi áidna, gii oažžu bálkkašumi. Reinola muitala sus lea buorre dovdu bálkkašumis.

– Gal dat lea hui buorre dovdu. Oasil dovdo maiddái nu, ahte oažžu muhtin láhkái návddašit luopmániid gáhkus. Dáshan leat olu ovttasbargoguoimmit, ahte dát nuoraidbargu lea dáppe ožžon doaibmat. Ohcejoga girkoráđđi ja -stivra leat mieđihan jahkelogiid ruđaid dása, ahte dán nuoraidbarggu lea ožžon ollašuhttit iežas oainnu mielde.

– Ja dasto go Ohcejohka lea dakkár unna servodat, nu ovttasbargguinhan dát ollašuvvá. Beaiveruovttuiguin, skuvllaiguin, báikkálaš valáštallanservviiguin, gieldda sosiáladoaimmain, bolesiin ja buohkain leat bargan ovttasbarggu.

"Rikkis jagit"

Juha Reinola lea doaibmán sullii 30 jagi Ohcejoga searvegotti nuoraidbargin.

– Dát leat leamašan rikkis ja fiinna jagit. Gal dat mánáid illu ja mokta ja sin gažaldagat leat dat bálkkašeaddji ášši. Ja dakkár guoddi fápmu lea maiddái dát kristtalaš nana osku, mas háliida mánáide muitalit, ja dakkár eallima fápmu. Gal dat leat dás dat váldoáššit.

Ohcejoga girkohearrá dieđáhusas muitalit, ahte bálkkašeami leat ákkastallan earet eará dainna, ahte Reinola vástoguovlu lea viiddis. Áidna bargin son bargá beaiveruovttoahkásaččain áranuoraidbargui ja logahatahkásaččaid rádjái. Dieđáhusas čállet, ahte guhkesáigásaš bargin Reinola dovdat báikegottis, ja su beallái lea álki jorgalit eallima sierra diliin. Su earenoamáš ánsu lea mánáid ja nuoraid deaivamis.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä