Sápmi |

ON nállevealahanlávdegoddi addán Supmii ohpit ávžžuhusaid buoridit sámiid dilli

Lávdegoddi ávžžuha Supmii ovdamearkan dan, ahte eamiálbmot galgá ieš oažžut meroštallat dan, geat dasa gullet. Sámedikki nuppi várresátnejođiheaddji Tuomas Aslak Juuso lea duđavaš dasa, ahte lávdegoddi lea addán dáid ávžžuhusaid.

sámediggi
Tuomas Aslak Juuso Sámedikki dievasčoahkkimis 19.12.2016 Govva: Linda Tammela / Yle Sápmi

Ovttastuvvan Nášuvnnaid nállevealahanlávdegoddi (CERD) lea addán Supmii ávžžuhusaid. Ávžžuhusat gusket ovdamearkan eanangeavahussii, iešmearrideapmái, davviriikkalaš sámisoahpamuššii, sosial- ja dearvvašvuođaáššiide ja oahpahusáššiide.

Sámedikki nuppi várresátnejođiheaddji Tuomas Aslak Juuso mielas lávdegoddi lea čielgasit dan oaivilis, ahte ovdamearkan iešmearrideami ektui Suopma ii leat čađahan iežas geatnegasvuođaid.

– Mu mielas dát nállevealahanlávdegoddi čielgasit lohká, ahte Suopma ii leat čuovvut soahpamuša ja lea vealahan sámiálbmoga dán iešmearridanrievtti vuođul go ieš vállje mearridit jienastanlogu kritearaid ja dan bokte dohkkehit olbmuid. Sáhka lea dan vuoigatvuođas, sámiálbmogis lea iešmearridanvuoigatvuođa vuođul vuoigatvuohta mearridit, geat gullet álbmogii, Juuso lohká.

Lávdegoddi lea gidden fuomašumi maid dasa, mot iešmearrideapmi oidno davviriikkalaš sámisoahpamuša soahpamuševttohusas.

– Lávdegoddi lea fuolas dakko, dan soahpamuša sisdoalus eallá ain dat seammá vuoigŋa go daddjo ahte Suoma stahta sáhttá já galgá sáhttit mearridit, geat gullet álbmogii ja dat lea álgoálbmogiid vuoigatvuođaid vuostá.

 “Dehálaš ahte dákkár ávžžuhusat bohte”

Juuso lea duđavaš dasa ahte lávdegoddi lea addán dáid ávžžuhusaid.

– Dát lávdegotti ávžžuhusat leat goitge nu alla dássi ávžžuhusat, ahte Suomas lea bággu reageret daidda. Das lea bággu vástidit daidda ja bidjat doaimmaid johtui, Juuso lohká.

 Juuso vuordá dal dan, mot Suopma áigu reageret dáidda ávžžuhusaide.

– Sii leat ieža iežas geatnegahttán čuovvut dáid ávžžuhusaid, son lohká.

Ovttastuvvan Nášuvnnaid nállevealahanlávdegotti ávžžuhusaid sáhttá fitnat lohkamin eaŋgalsgillii dáppe.

Beaiváduvvon 15.5.2017 dmu 15.13: lasihuvvon liŋka raportii

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä