Sápmi |

Päivi Aikasalo álggahan Ohcejoga searvegotti báhppan cuoŋománu álggus

Báhppa Päivi Aikasalo lea álggahan Ohcejoga mearreáigásaš girkohearrán 1.4. Son oaivvilda, ahte dál lei áigi nissonbáhppii.

Hämeenlinnalainen Lempäälän seurakunnan seurakuntapastori, filosofian tohtori Päivi Aikasalo
Báhppa Päivi Aikasalo lea álggahan Ohcejoga mearreáigásaš girkohearrán Govva: Markku Karvonen / Yle

Päivi Aikasalo muitala, ahte bargu lea álgán hui bures.

– Dáppe Ohcejogas lea nu fiinnis ja dál orru leamen ahte barggutge leat muttágit.

Aikasalo muitala, ahte ii leat ovdal leamašan ná davvin barggus.

– Mun lean gal ovdal jo jurddašan ja maiddái ohcan Lappi searvegottiide bargui, muhto in leat duođai leamašan. Lean leamašan Hämees njealji sierra searvegottis barggus.

Beroštupmin maiddái sápmelaš kultuvra

Päivi Aikasalo vuordá, ahte davvin bargan addá sutnje juoidá ođđa.

– Mun háliidan oaidnit sámi jagiáiggiid. Ja gal mun jáhkán, ahte mus lea olu oahppanláhkái dás barggus. Ja jurddašan ahte dás lea muttágit hástalus maiddái.

– Mun lean duođai illudan sámi giđđadálvvi čábbodagas. Dáppe lea hui fiinnis, Ohcejogas lea hui fiinna girku, Gáregasnjárggas lea hui fiinna kapealla ja Ohcejoga báhppal lea hui fiinna sajis.

Ohcejogas lea sápmelaččain eanetlohku. Aikasalo jáhkká, ahte sii sáhttet oahppat nubbi nuppis.

– Mu okta skuvlejupmi lea maiddái etnográfa, nu dan dáfus mu beroštupmin lea maiddái sápmelaš kultuvra.

"Searvegottiid ovttasteapmi váttis gažaldat"

Päivi Aikasalo doaibmá virggis 31.12.2017 rádjái. Son vuordá barggánis jagi.

– Vuorddán, ahte mun beasan oahpásmuvvat miellagiddevaš olbmuide, ja gal mun vuorddán ja sávan ahte Ohcejoga searvegotti áššit leat buori ortnegis jagi loahpas.

Ohcejoga searvegotti leat ovttastahttimin Anára searvegoddái. Aikasalo oaivvilda, ahte dát lea váttis gažaldat.

– Muhto dása lea ásahuvvon čielggadanalmmái Juha Muilu, ja son boahtá beassáža maŋŋel galledit sihke Anára searvegottis ja mis Ohcejoga searvegottis sierra báikkiin, ja áššis ságastallat vel.

"Ohcejogas dárbbašit nissonolbmo"

Ohcejogas eai leat ovdal leamašan nissonbáhpat. Päivi Aikasalo oaivvilda, ahte dál lei áigi nissonbáhppii.

– Dál orru, ahte Ohcejogas dárbbašit juste nissonolbmo. Mu leat váldán nissonin ja báhppan bures vuostá, das mun lean ilolaš. Mun jurddašan, ahte dat ii gal dál dán barggus hehtte ollenge.

– Nissonbáhpat leat min girkus goittotge leamašan jo measta golbma jahkelogi, nu dat lea muhtin olbmuide dehálaš, ahte sii oidnet ahte maiddái nissonolmmoš sáhttá leat báhppa.

Aikasalo ii jáhke dan leat báikkálaččaide mihkkege čuolmmaid, ahte searvegottis lea nissonbáhppa.

– Mun jáhkán, ahte go ášši boahtá lahka ja go oahpásmuvvat, nu gal mii dás ceavzit.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä