Sápmi |

Paltto ILO-soahpamušas: Sáhtášii ovdánit, jos duođalaččat álget ovddidit

SDP ságadoalli Antti Rinne galledii Ohcejotnjálmmis mannan vahkuloahpa. Son lohpidii ovddidit ILO 169 -soahpámuša ratifiserema. Sámedikki várreságadoalli Heikki Paltto ii dieđe galggašiigo Rinne ságaide jáhkkit.

Jietna: Heikki Paltto
Jietna

Suoma sosiálademokráhtalaš bellodaga ságadoalli Antti Rinne dajai mannan sotnabeaivve Ohcejogas ordnejuvvon dilálašvuođas, ahte SDP jurdda lea fas bidjat johtui ILO  169 –soahpamuša ratifiserema.

Sámedikki vuosttas várreságadoalli Heikki Paltto ii dieđe galggašiigo Rinne ságaide jáhkkit.

– In dieđe jáhkángo vai in. Dieđusge dat livččii buorre jos dat álget ovddidit. Muhto ovddit háve go SDP lei stivrras, de dalle sii vuostálaste dan. Dálhan leat goittotge válggat boahtimen nu danhan ii dieđe, bellodatjođiheaddji sáhttá dieđusge vehá rámidahttit, ahte sii álget ovddidit. Muhto doaivvu mielde álget, dathan livččii duođai buorre.

Paltto jáhkká ahte ratifiseren sáhtášii goittotge ovdánit.

– Dieđusge sáhtášii ovdánit, jos dat fal duođalaččat álget ovddidit dan. Muhto eará bellodagat váikkuhit maid, jos dat čatnasit dasa, dallehan dat ratifiserejuvvo.

"Sámiid áššit heajos dilis"

Sámedikkis lea plánan deaivvadit riikkabeaiáirasiid.

– Mii áigut geahččalit oažžut eambbo sin beroštumi ja ahte sii válddášedje duođalaččat vuhtii sámiid gažaldagaid ja sámiid dili. Muhto dat lea nu olu gitta dain riikkabeaiáirasiin. Galhan dat dihtet daid áššiid, muhto mun in dieđe mii dat dasto lea. Leago dat dát áigi vai, dál lea birra máilmmi dakkár, ahte álgoálbmogiid eai váldde nu duođas vuhtii.

Heikki Paltto oaivvilda, ahte politihkkarat eai guldal sápmelaččaid.

– Miihan gal duođas leat geahččalan ja geahččalan ain ovddidit muhto dat lea nu, ahte dat fal eai váldde sámi olbmuid vuhtii nugo galggašii. Dieđusge muhtin áššit ovdánit, muhto juste dakkár vuoigatvuođalaš áššit ja gažaldagat eai dáhto ovdánit.

– Dál lea vehá dakkár dilli Suomas, ahte sámiid dilli lea oalle heajos gal. Min áššit eai ovdán doppe riikkabeivviin. Dál bođii meahciráđđehusláhka, dasto lei Deanu soahpamuš. Sámiid áššit leat hui heajos dilis.

Heikki Paltto lei mielde Buorre iđit Sápmi –sáddagis 15.3.2017.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä