Sápmi |

Sameblod-filbma čájehuvvo Anáris

Bálkkašuvvon ruoŧŧelaš Amanda Kernell filbma Sameblod čájehuvvo gaskavahku Sámekulturguovddáš Sajosis Anáris diibmu 19.00.

Sajos
Govva: Vesa Toppari / Yle

Internašunála Sámi filbmainstituhta prošeaktabargi Sunna Nousuniemi muitala, ahte filmma čájeheapmi lea ovdavuosttaseahket Suomas.

– Dat ii leat nugo premieara, dat lea dakkár ovdavuosttaseahket. Mii háliidit fállat dan vejolašvuođa, ahte olbmot dáppe Sámis besset oaidnit dan filmma. Ahte ii dárbbaš dasto vuordit dohko čakčii, go galggašii boahtit almmolaš filbmateáhteriidda Suomas.

– Internašunála Sámi filbmainstituhtta ja Sámekulturguovddáš Sajos leat lágideamen čájáhusa boahtte gaskavahku, nu dalle viimmatge dáppe Suoma beale sámitge besset geahččat dan Amanda Kernell ođđa filmma, illuda Nousuniemi.

Sameblod-filmma čájeheapmi Anáris lea oassi unna turneačča.

– Internašunála Sámi filbmainstituhta lea ruhtadan filmma ja dál dasto ISFI lea bargan dakkár turnea, ahte mii leat čájehan Sameblod miehtá Sámi. Guovvamánusge mii ordniimet Troandimis Sameblod-čájáhusa, ja dál dat lea čájehuvvon maiddái Guovdageainnus ja Kárášjogas. Dasto mii dieđusge háliideimmet boahtit deike Anárii čájehit dan.

"Plániimet čájehit Skábmagovaid maŋŋel"

Nousuniemi muitala, ahte filbma plánejuvvui čájehit jo Skábmagovain Anáris. Dalle dat ii goittotge lihkostuvan.

– Mii duođaidge háliideimmet čájehit Sameblod dán jagi Skábmagovain, go Sameblod lea goittotge vuosttaš dakkár fikšuvdnafilbma mii lea sámegillii ja mas lea nissonbagadalli. Muhto Sameblod lei válljejuvvon maiddái Göteborg filbmafestiválii, mii lei seamma áigge go Skábmagovat. Göteborg filbmafestiválas lei maiddái gilvu, masa Sameblod beasai fárrui, nu mii eat dasto sáhttán čájehit dan filmma Skábmagovain, go Göteborg filbmafestivála gáibidii oažžut dan davviriikka vuosttašeahkeda.

– Dasto mii plániimet, ahte mii čájehit dan Skábmagovaid maŋŋel Anáris ja ovttasbargat Sajosiin. Ja duođainge dathan lei buorre loahpaloahpas, ahte dat filbma čájehuvvui Göteborgas. Dat filbma vuittii doppe stuorámus davviriikkalaš bálkkašumi, mii gohčoduvvo The dragon award ja maiddái dan dihte dat Sameblod lea ožžon hui ollu fuomášumi, dáppe Suomasge.

"Ávžžuhan buohkaide"

Sunna Nousuniemi ávžžuha filmma buohkaide.

– Dat lea hui dehálaš, ahte mii dál čájehit dan dáppe Anáris. Mu mielas lea hui dehálaš ahte mii sámit beassat viimmatge geahččat min iežamet muitalusaid dakkár stuorát šearpmas. Mun gal dajašin ahte mun ávžžuhan dán filmma buohkaide.

– Dát lea hui fiinna vásáhus geahččat dan filmma ja das lea duođaige juohkehažžii juoidá fállat. Mun maiddái sávan, ahte buohkat bohtet dan geahččat dáppe Anáris. Dat lea hui earenoamáš dilálašvuohta beassat geahččat mo min sámi filbmaindustriija lea mannamen ovddos guvlui ja mo mii leat menestuvvan. Ja mun gal jáhkán ahte boahttevuođas mis bohtet leat lasi dakkár filmmat, mat menestuvvet.

Anára čájáhusa bileahtaid haddi lea 5 euro, ja daid sáhttá oastit Sajosis. Filmmas hállat ruoŧagiela ja lullisámegiela ja dat lea tekstejuvvon eaŋgalsgillii.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä