Sápmi |

Sámedikki stivralahttut deaivvadedje ruhtadoallominister Orpoin – ráđđehus lohpida lasseresurssaid

Sámedikki stivralahttut ja ruhtadoallominister Petteri Orpo deaivvadedje mannan bearjadaga Helssegis. Sámedikki nubbi várreságadoalli Tuomas Aslak Juuso lei duđavaš deaivvadeapmái.

petteri orpo
Sámedikke stivralahttut Tuomas Aslak Juuso ja Pentti Pieski deaivvadeigga ruhtadoallominister Petteri Orpoin Helssegis 5.5.2017. Govva: Ruhtadoalloministeriija

Sámedikki stivralahttut ja ruhtadoallominister Petteri Orpo deaivvadedje mannan bearjadaga Helssegis. Sámedikki ovddasteaddjit ja minister Orpo ságastalle Sámedikki bargguin ja doaimmain ja maiddái doaibmaresurssain.

Sámedikki stivralahttut bukte ovdan dan, ahte Sámedikki doaibmaresurssat leat unnon ja barggut fas lassánan. Ruhtadoallominister Petteri Orpo muitalii Sámedikki ovddasteaddjiide, ahte Suoma ráđđehus lea fuomášan dili ja evttohange lassiresurssaid boahttevaš jagiide. Suoma ráđđehus mearridii áššis cuoŋománus.

Sámedikki nubbi várreságadoalli Tuomas Aslak Juuso lei duđavaš deaivvadeapmái.

– Lean hui ilus, go ruhtadoallominister Orpo lea nu rabas ja mielas ságastallat. Lean duđavaš, ahte stáhta dál lea oaidnán, ahte mis eai leat resurssat doarvái ja lea dál gearggus lasihit daid ruđaid ja min doaibmanvejolašvuođat dál nannejuvvojit, dadjá Tuomas Aslak Juuso.

Jahkásaš ságastallan ruhtadoalloministeriijain

Sámedikki nubbi várreságadoalli Tuomas Aslak Juuso oaivvilda, ahte deaivvadeapmi lei stuorra oktasaš lávki Sámediggái ja ruhtadoalloministeriijaii.

– Dákkár jahkásaš ságastallan ruhtadoalloministeriijain lea positiiva ovdáneapmi. Dat lea iešalddis historjjalaš dáhpáhus, ahte mii leat soahpan ruhtadoalloministeriijan, ahte mii jahkásaččat mannat čađa áššiid ja ságastallat Sámedikki bušeahttas. Dat lea issoras stuorra lávki, dadjá Tuomas Aslak Juuso.

Ođđa doaimmaid ii leat vejolaš álggahit

Váiko stáhtas leage boahtimin dál eanet ruhta Sámedikke doaimmaide, de ođđa doaimmaid ii oro leamen vejolaš álggahit.

– Dat resurssat mat leat boahtimin, de dat galget sihkkarastit dálá doaimmaid. Sámedikkis leamašan hástalus doalahit dálá doaimmaid jođus, go min bušeahtashan leat čuohppan jagi 2015 rájes. Muhto mii leat gal ovdanbuktan ruhtadoalloministeriijai ođđa doaimmaid, maid Sámediggi aiggošii oažžut dohkkehuvvot jođáneamos lági mielde. Vuostáiváldin lei positiiva ja ministeriija bealis ipmirdedje, ahte man olu Sámedikkis leat virggit ja mo muhtin virgeolbmot gillájit issoras stuorra bargonođiin, iige dat lea dohkkálaš dilli, dadjá Tuomas Aslak Juuso.

– Sámediggi lea dál geahččaleamin oažžut ođđa doaimmaid johtui. Dieđiheaddji virggi vuođđudeamiin ja riikaidgaskasaš strategiijain leat systemáhtalaččat bargan. Muhto ruhtadilli birra muitala olu, ahte Sámediggi ii baste dán jagi čoahkkanit go golmma háve, váiko dábalaččat lea čoahkkanan njeallje háve. Dat gal ii leat buorrin demokráhtalaš ovdáneapmái. Ja dan gal dihtet maiddái Suoma ráđđehusas maid, muitala Sámedikki nubbi várreságadoalli Tuomas Aslak Juuso.

Tuomas Aslak Juuso lei mielde Dearvva-sáddagis 9.5.2017.

Beaividuvvon 9.5.2017 diibmu 11:52.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä