Sápmi |

Sámemusea Siida almmustahttá čoakkáldagaidis interneahtas

Sámemusea almmustahttá iežas čoakkáldagaid vuosttas háve interneahtas. Čoakkáldagat leat oaidnimis buohkaide rabas ohcanbálvalus Finnas.

Hämeenlinna gávpotmusea sámedávvirčoakkáldaga 1800-logu gietkka
Hämeenlinna gávpotmusea sámedávvirčoakkáldaga 1800-logu gietkka Govva: Sámemusea Siida

Riikkaidgaskasaš museabeaivvi ávvudit Sámemusea ja Davvi-Lappi luondduguovddáš Siiddas duorastaga 18.5.2017. Sámemusea almmustahttá dan beaivve iežas čoakkáldagaid vuosttas háve interneahtas buohkaide rabas ohcanbálvalus Finnas, www.finna.fi.

Sámemusea čoakkáldagaid almmustahttet vuosttas háve Finna-bálvalusa almmolaš diehtovuođus. Finna lea museaid, arkiivvaid ja girjerájuid oktasaš ohcanbálvalus. Riikkaidgaskasaš museabeaivve  Sámemusea čoakkáldagain Finnas almmustahttet badjel 500 dávvira. Sámemusea čoakkáldagain Finnas beassá vuosttamužžan geahčadit Museaguovddáš Vapriikki ja Hämeenlinna gávpotmusea skeŋken sámečoakkáldagaid, gahpir- ja beaskačoakkáldagaid ja Nuortalaččaid árbevierrodálu dávvirčoakkáldaga. 

Finna beaivvidit olles áigge, nappo čoakkáldatdávviriid ja boahttevuođas maiddái govvaarkiivva govaid beassá dutkat ain buorebut.

Máttut-čuovgagovvačájáhus rahppojuvvo

Museabeaivvi prográmmas lea maid sápmelaččaid eallima 1900-logu álggus 1950-logu rádjai ovdanbukti Máttut-čuovgagovvačájáhusa rahpan. Máttut -čuovgagovvačájáhus oahpásmuhttá Suoma sámiid eallimii 1900-logu álggu rájes jahkečuođi beallemuddui. Čájáhusas sámekultuvrraid girjjatvuohta oidno árbevirolaš ealáhusaid, rikkis gákteárbevieru ja Sámi molsašuvvi duovdagiid ja jagiáiggiid bokte.

Máttut-čájáhus lea čohkkejuvvon Sámemusea Siidda govvačoakkáldaga govain. Čájáhusa govat leat váldojuvvon birra Sámi, earret eará Anáris, Ohcejogas, Čeavetjávrris ja Eanodagas. Govvejeddjiid duogážat leat hui sierraláganat; oassi govain leat priváhtaolbmuid govvabearpmain, oassi Lappi turisttaid govat ja oassi fas ámmátgovvejeddjiid barggut. Govain leat Sámit sihke árgabeaivvi buđaldusain ja plánejuvvon govvendilálašvuođain.

Čájáhusa rahpan ja ovdan buktin lea 18.5.2017 dmu 10.00. Siidda vuollegearddi molsašuvvi čájáhusaid sáles. Sámemusea Finna almmustahttin lea Siidda auditorias dmu 13.00. Riikkaidgaskasaš museabeaivve Siidda čájáhusaide lea sisabeassan nuvttá.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä