Sápmi |

Sámemusihkka Suoma riikkaradiokanálii – "Mis lea álo leamaš jáhkku, ahte Suoma bealde gal dovdet buori musihka"

Boahtte vahku rájes čuodjá Felgen orkester suomagielat riikkaradiokanála Radio Suomi a-čuojahanlisttus. – Mis lea álo leamaš jáhkku, ahte Suoma bealde gal dovdet buori musihka, láhttesta Felgena gitaračuojaheaddji ja vokalista Petter Tretnes Hansen.

Jietna: Felgen Orkester
Jietna
Álgá áiggis 1:43:41

Felgen orkestera váras Jovnna-bihttá čuodjá vuosttaš háve riikkaviidosaš Radio Suomi ođđa musihka prográmmas jo sotnabeaivve diibmu 13:03. Sáddagiin Jovnna gullogoahtá boahtte vahku rájes.

Suomagielat radiokanálain sámemusihkka gullosta duollet dálle, muhto čuojahanlisttuide beassan lea hárvenaš.

– Duođas dat lei hui somás diehtu diet midjiide. Diekkár váttisvuođathan leat dáppe Norgga bealde maiddái, sámemusihkain olahit dobbelii mahká go Sámeradioi. Dáppe lea maid hui váttis beassat sihke P1:žii, mii gullo miehtá Norgga.  P3:žis mii lea nuoraidkanála lea vel váddásut, aŋkke dákkár čielga sámemusihkain mas lea dušše sámegillii visot, čilge Hansen.

Ná čállá Radio Suomi Felgen orkestera Jovnna-bihtás.

Felgen orkester lea Norgga sápmelaš musihkkariid joavku, man musihkas gullojit davviguovlluid lassin ilolaš pop- ja folkrock-váikkuhusat. Teavsttat leat davvisámegillii ja dárkkes beljiin guldalettiin čuodjá luohtige lávllas Jovnna, mii álggaha joavkku maŋimuš Duhát jagi geahčen -albuma. Joavku muitala musihkkaset ožžon váikkuhusaid ee. Kentas, Bruce Springstreenas, Mark Knopfleris ja Pogues-joavkkus. Jagis 2011 vuođđuduvvon kárášjohkalaš bánda bálkkašupmiskáhpii lea jo lasihuvvon vuoitopokála jagi 2016 Sámi music awards-gilvvus. Dan joavku oaččui Jagi sápmelaš radiošuokŋa-kategorias. Ja dat lea dušše álgu. Let's yoik'n'roll!

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä