Sápmi |

Sámi musihkkaakademiija studeanttat leat guorran iežaset ruohttasiid – konsearttat Ohcejogas ja Anáris

Sámi Musihkkaakademiija oahppit leat ohcan luđiid ja liđveid, mat laktasit oahppiid iežaset sohkii. Yle Sámi sáddagis duorastaga áššis lei muitaleamen Anna Morottaja Anáris.

Jietna: Sámi Musihkkaakademiija oahppit
Jietna

Sámi oahpahusguovddáža Sámi Musihkkaakademiija fállá sámemusihkkaoahpuid rávesolbmuide. Dán oahppojagi studeanttat leat beassan oassálastit Lahppon luođit ozus -kursii, mas sii leat guorahallan iežaset ruohttasiid ja geahččalan gávdnat iežaset sogaid luđiid. Kurssa bohtosiid beassat dál gullat konsearttain sihke Ohcejogas ja Anáris.

– In dovdan ovttage luođi mu sogas ovdal vázzigohten Sámi Musihkkaakademiija ja dan kurssa. In livčče jáhkkán gávdnat maidege, muhto nu mun gávdnen inge dárbbašan oba nu máŋgga sohkabuolvva duohken ohcat. Oalle gelddolaš lea go mii studeanttat beassat buohkat dál lávddi ala rohttet luđiid ja muitalit muitalusaid maid leat gávdnan, sámemusihkkastudeanta Laura Tapiola Ohcejogas muitala.

Konsearttas maiddái anáraš livđet

Gávdnon luođit ja livđeh -konsearttas gullat luđiid lassin anáraš livđiid. Livđe lea anáraččaid juoigansuopman, mii lea leamaš láhpposis máŋggalot jagi muhto gávdnui anárašgiela ealáskahttima miehtebiekkas. Lávddi alde konsearttas leat Sámi Musihkkaakademiija studeanttat Erke Eriksen, Heli Huovinen, Auli Länsman, Anna Morottaja ja Laura Tapiola.

Konsearta lea oassi Čuojat! Juoigga! Livđuu! Leudde! -prošeavtta oahpuid. Prošeavtta leat ruhtadan Lappi ELY-guovddáš ovttas Ohcejoga, Anára ja Eanodaga gielddaiguin. Ohcejoga konseartta lea mielde lágideame maiddái Sámi Siida rs.

Konsearttat leat Ohcejogas vuossárgga 24.4. dmu 18, Davit Áilegas-dálus, ja Anáris bearjadaga 28.4. diibmu 21, Hotel Kultahovis.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä