Sápmi |

Sámi servodatberošteaddjit áiggoše bissehit Suttesjoga gávppálaš ávkkástallama – "Mii mannat vaikko man guhkás dáinna áššiin"

24 sápmelačča leat vuolláičállán rabas reivve mas gáibidit, ahte Suttesjoga gávppálaš čáhcefitnu šluhttejuvvo. Sin áigumuššan lea bissehit Suttesjoga gávppálaš ávkkástallama.

Suttesája
Govva: Mikkal Morottaja / Yle

– Mii bisseheimmet Suttesádjaga gávppálaš ávkkástallama jo oktii  ja mii dahkat dan ođđasis!

Nie čállet sámi servodatberošteaddjit rabas reivves, man čujuhit eandalitge Meahciráđđehussii ja Ohcejoga gildii. Vuolláičállit oaivvildit, ahte Suttesjohka, lahka Gáregasnjárgga, Ohcejoga gielddas lea sámiid bassi báiki ja oassi oktasaš kulturárbbis ja danin sii eai dohkket dan privatiserema ja gávppálaš ávkkástallama.

– Bassi guovlun Suttesádjaga guovllu duođaštit máŋggat báikenamat. Guovllus lea stuorra mearkkašupmi sápmelaččaide viidásit ja dat leamašan sámiid oktasaš guovlu ovdal riikkarájáid gitta otná beaivve rádjái, čállet sii.

Jáhkku bissehit doaimma

Ohcejohkalaš Kirste Paltto lea okta reivve vuolláičálliin ja lea rahčan ovdalge Suttesjoga bealis. Palttos lea jáhkku, ahte sii nagodit bissehit Suttesjoga gávppálaš čáhcefitnu dánge háve.

– De dieđusge lea jáhkku. Mii mannat vaikko man guhkás dáinna áššiin ja leat gergosat doalvut ášši riikkaidgaskasaš arenaide ja máilmmeviidosaš biras- ja eamiálbmotrivttiid aktivisttaid fierpmádagaide. Sávvat oažžut doarjaga maiddái Norgga ja Ruoŧa beale sámiin, dadjá Kirste Paltto.

Kirsti Paltto
Kirste Paltto Govva: Dan Robert Larsen / NRK Sápmi

Rabas reivve leat vuolláičállán sápmelaččat miehtá Sámi ja Suoma.

– Dál mis leat olu eanet olbmot mielde, go maŋimuš háve. Leat olu olbmot geaid namat eai leat dan listtus, muhto sii dorjot min, muitala Paltto.

Reivves sii čilgejit manne vuostálastet Suttesjoga gávppálaš čáhcefitnu ja mo dat sin mielas rihkošii sápmelaččaid kultursuoji ja sápmelaččaid vuoigatvuođaid eamiálbmogin.

– Mii gáibidit, ahte Suttesádjaga gávppálaš čáhcefitnu šluhttejuvvo ja čáhcefitnu álggaheaddjit ohcet eará sajis lobi vuovdigoahtit vuođđočázi. Mii doarjut bargosajiid Ohcejohkii, muhto vuostálastit čáhcefitnu Suttesádjaga bassi guovllus. Buhtes vuođđočáhci gávdno juohke sajis Ohcejoga gielddas, čállet sii reivves.

 

Dat olbmot leat vuolláičállán rabas reivve:

Jovnna Jon Ánne Kirste / Kirste Paltto

Evá Hánssa Hilma / Hilma Mustonen

Benne Per Sofe Ovllá Raila / Raila Pirinen

Skuvll'albmá Áslat Niillas Áslat / Áslat Holmberg

Gová Nikko Lásse Nils-Heaikka Sámmola Sunná / Sunna Valkeapää

Áles Ovllá Arvi / Arvi Hagelin

Jovnna Jon Ánne Kirstte Rávdná / Rauna Kuokkanen

Jovnna Jon Ánne Máret / Máret Paltto

Jergul Lemet Iŋggá Raghilda Hilde / Hilde Holmestrand

Jovnna Jon Ánne Máret Kirsi / Kirsi Paltto

Jovnna Ándde Arvi Tomi / Tomi Guttorm

Skuvll´albmá Áslat Veikko Niillas / Niillas Holmberg

Biennaš Jon Jovnna Piera Suvi / Suvi West

Bikká Ándde Lahja Meeri / Meeri Ojanperä

Niillasaš Ovllá Ovllá Elna Ánne Márjá / Anne-Maria Magga

Niillasaš  Ovllá Ovllá Elna Rosa Máren / Rosa Maren Magga

Niillasaš Jovnna Máret Juhani Sunna / Sunna Nousuniemi

Biennáš Elle Ovllá Elle Máreha Minna / Minna Rasmus

Kuobža-Piáka Ánná / Anna Morottaja

Áslat-Niillas Oddmundda Niillas / Beaska Niillas

Heaik´ Ovllá Seija-Risten / Seija-Risten Somby

Heaik´ Ovllá Arjja Rávdná / Rauna Rahko

Mihku-Ilmara Jenni / Jenni Laiti

Gáijjot Ántte Issáha Duommá / Tuomas Juuso

 

Kirsti Paltto lei mielde Buorre iđit Sápmi -sáddagis 19.4.2017.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä