Sápmi |

Sanila-Aikio duđavaš sámesoahpamuša gullandilálašvuhtii Ohcejogas

Sámedikki ságadoalli Tiina Sanila-Aikio lei duđavaš dasa, ahte moaddelot olbmo bohte gullat ja ságastit sámesoahpamušas ikte Ohcejohkii. Ohcejohkalaččaid fuolat soahpamuša ektui gusket eanáš guolásteapmái.

Tiina Sanila-Aikio
Govva: Mikkal Morottaja / Yle

Sámediggi lágida rabas gullandilálašvuođaid sámesoahpamuša ektui miehtá Suoma beale Sámi. Ikte duorastaga Ohcejogas čoahkkanedje vuosttas gullandilálašvuhtii. Moaddelot olbmo bohte báikki ala ságastit ja gullat eambbo soahpamuša sisdoalus.

Sámedikki ságadoalli Tiina Sanila-Aikio atná dábálaš olbmuid oaiviliid dehálažžan. Bajimužžan olbmuin orui leamen fuolla Deanuleagi guolásteamis.

– Dieđusge Deanu soahpamuš gullui ságain, ja dat guolástanárbevierru, ealáhus. Dieđusge dan ádden hui bures go Deanuleagi olbmuin lea gažaldat.

Soahpamuša sáhttá leat váttis vuosttildit dahje doarjut, jos ii ipmir mohkkás soahpamušteavstta sisdoalu. Oktan ulbmilin sámedikkis leage lasihit dieđu ja čilget soahpamuša sisdoalu olbmuide, Sanila-Aikio muitala.

– Ferte maid dadjat, ahte daid dilálašvuođaid ulbmil lea juohkit dieđu dan soahpamuša sisdoalus ja viiddidit áddejumi sisdoalu hárrái. Ii dat láhkateaksta leat álki dábálaš olbmuide geat eai leat hárjánan lágaid lohkat.

Lávdegottit gieđahallet soahpamuša miessemánus

Sanila-Aikio ii leat behtton, vaikke nu olu olbmot eai Ohcejoga gullandilálašvuhtii boahtánge. Son ipmirda, ahte dákkár áššiide ii leat álo nu álki oassálastit. Sanila-Aikio goittotge sávvá olbmuid boahtit daidda gullandilálašvuođaide, mat vel dollojit.

Čuovvovaččat sámediggi čohkke buot njálmmálaš ja čálalaš cealkámušaid sámedikki lávdegottiid ja ráđiid gieđahallama várás.Lávdegoddegieđahallan dáhpáhuvvá sámedikkis miessemánu áigge.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä