Sápmi |

Sápmelaččat váldostivrii Roavvenjárggas, Raahes, Asikkalas ja Kempelees – Helssegis ja Kangasalas eai beassan

Mikkel Näkkäläjärvi válljejuvvui Roavvenjárgga váldostivrii ja Jussi Isokoski fas Raahe váldostivrii. Pentti Pieski Helssegis ja Mika Laiti Kangasalas eaba beassan váldostivrraide, muhto leaba goittotge duđavaččat bohtosii.

Mikkel Näkkäläjärvi
Mikkel Näkkäläjärvi beasai Roavvenjárgga váldostivrii SDP listtus. Govva: Mikkel Näkkäläjärvi

Mikkel Näkkäläjärvi válljejuvvui Roavvenjárgga váldostivrii Sosiálademokráhtaid listtus.

– Galhan das oalle fiinna dovdamušat leat. Vuosttaš geardde evttohassan ja dat 335 jiena dáide boahtit, nu galhan dat oalle giitevažžan geassá. Ja dagaime gal fiinna bohtosa olles listtus, ahte loktaneimmet njealját sajis dál nuppi sadjái, dássálagaid Olgešbellodat Kokoomusain. Gal dat leat buorre dovddut dál, ja dálhan dat bargu dasto iešalddes easka álgá.

Näkkäläjärvi muitala, ahte ii máhttán vuordit dákkár bohtosa.

– In gal duostange vuordit, ahte dat aivve ná bures manašii. Gal dies lagabus válggaid álge boahtit dakkár árvvosmahtti sánit ja sáttasánit olbmuin, ahte leat fitnan jienasteamen. Gal mun das álgen smiehttat, ahte gal dás aivve bures sáhttá geavvat, muhto bođii gal heahkastupmin ahte ná bures. Galgá leat duđavaš. Listtu nubbihan mun mis ledjen, nubbin eanemusat jienaid ožžon, riikkabeaiáirras Johanna Ojala-Niemelä maŋŋá.

Isokoski Raahe váldostivrii

Tuupa Records toimâttâshovdâ Jussi Isokoski.
Jussi Isokoski. Govva: Eljas Niskanen / Yle
Jussi Isokoski beasai Raahe váldostivrii Guovddáža listtus 153 jienain.

– No somáhan dát dieđusge lea, ja eandalii go jietnamearri lei nuo stuoris. In máhttán gal vuordit duokkár jietnameari. Hui buorre dovdu ja lean hui ilolaš ja positiivvalaččat heahkastuvvan.

– Gal mun dan jurddašin, ahte válljejuvvon, muhto in jurddašan ahte jienat bohtet nu olu.

"Buorre čatnat oktavuođaid"

Pentti Pieski lei Ruoŧŧelaš álbmotbellodaga evttohassan Helssegis. Son oaččui 74 jiena, mii ii reahkkán váldostivrabáikái. Pieski oaivvilda goittotge leat duđavaš dán bohtosii.

– Mun lean áibbas duđavaš dasa jietnamearrái, ja galhan mun dan jo dihten ahte man olu jienaid dárbbaša dasa, ahte beassá Helssegis váldostivrii. Dien láhkái ledjen realisttalaš, ahte in nu hirbmat olu oba vuordánge dohko beassama, go dat livččii gáibidan olu eanet barggu go mii mus lei vejolaš bidjat dasa válgabargui.

Pentti Pieski 23.2.2016
Pentti Pieski. Govva: Yle

– Dakkár jietnameari mun jurddašin, ahte lea vejolaš oažžut. Mun vehá smihtten, ahte jos badjel čuođi livččii mannan, de livččen lean hirbmat duđavaš dan ektui maid bargen daid válggaid ovdii.

Pieski oaivvilda evttohassan leahkin lei buorre vásáhus.

– Muhto muđui dat lei áibbas somás vásáhus ja das lei buorre čatnat buriid oktavuođaid ruoŧŧelaš álbmotbellodaga olbmuide ja maiddai eará evttohasaide, geat besse dál dohko váldostivrii. Lei goittotge hui dehálaš leat evttohassan ja dat addá dieđusge buoret vejolašvuođaid dasto go mii dáppe Helssegis viggat gielalaš vuoigatvuođaid ovddidit.

Moadde jiena váilo várrelahttun beassamis

Mies kaupungissa puiston laidalla
Mika Laiti. Govva: Jan Hynnä / Yle
Mika Laiti lei Ruonáid evttohassan Kangasala gielddaválggain. Son oaččui 34 jiena, mii lei menddo unnán váldostivrii. Laiti oaivvilda ahte boađus lea buorre dan ektui, ahte son ii leat orron Kangasalas go moadde jagi, iige leat leamašan politihkas mielde.

– Mun ledjen guovtti-golbma jiena eret das, ahte livččen várrelahttun beassan. Issoras duđavaš, ahte nu veháš áigge orron gielddas ja oba dovddage olu olbmuid ja ožžon 34 jiena, nu dathan manai hirbmat bures. Go dakkár olbmot, geat leat orron olles eallima doppe, nu báhce mu maŋábeallai dáin válggain.

Maiddái dát sápmelaš evttohasat besse čađa gielddaválggain:

Heikki Autto beasai Roavvenjárgga váldostivrii 1235 jienain. Son ovddasta Olgešbellodat Kokoomusa.

Juha Tapiola beasai Ruonáid ovddasteaddjin Asikkala gieldda váldostivrii 173 jienain. Asikkala lea gielda Lahti gávpoga davábealde.

Rita Kumpulainen beasai Kempele gielddaválggain čađa 167 jienain. Kumpulainen beasai váldostivrii Sosiálademokráhtaid listtus. Kempele gullá Davvebađaeatnama eanagoddái.

Isokoski, Laiti, Näkkäläjärvi ja Pieski ledje mielde Dearvva-sáddagis 10.4.2017.

Editerejuvvon 11.4.2017 dbm. 10.07: Lasihuvvon diehtu Autto, Kumpulainen ja Tapiola válljemis váldostivrii.

11.4.2017 dbm 11.42 Bajilčállagii lasihuvvon Asikkala ja Kempele

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä