Sápmi |

Siiddas ávvudit odne riikaidgaskasaš museabeaivvi – čájáhusaide sáhttá oahpásmuvvat nuvttá

Sámemusea Siida Anáris ávvuda odne riikaidgaskasaš museabeaivvi. Olles beaivvi beassá oahpásmuvvat čájáhusaide nuvttá.

Saamelaismuseo Siida
Govva: Vesa Toppari / Yle

Riikkaidgaskasaš museabeaivvi ávvudit Sámemusea ja Davvi-Lappi luondduguovddáš Siiddas odne duorastaga. Riikkaidgaskasaš museabeaivve Siidda čájáhusaide lea sisabeassan nuvttá. Siidda amanueansa Anini Guttorm oaivvilda ahte riikaidgaskasaš museabeaivi lea hui dehálaš.

– Sámemusea Siida lea dál ávvudan dan beaivvi jahkásaččat, juohke jagi leamašan álot prográmma. Beaivi čalmmustahttá min barggu ja lasiha dan mearkašumi, olbmot de dihtet maid mii dáppe bargat, dadjá amanuensa Anni Guttorm.

Máttut-govvačájáhus rahppojuvvon

Odne Siiddas rahpojuvvui maiddái Máttut-govvačájáhus. Máttut -čuovgagovvačájáhus oahpásmuhttá Suoma sámiid eallimii 1900-logu álggu rájes jahkečuođi beallemuddui. Čájáhusas sámekultuvrraid girjjatvuohta oidno árbevirolaš ealáhusaid, rikkis gákteárbevieru ja Sámi molsašuvvi duovdagiid ja jagiáiggiid bokte.

Anni Guttorm
Amanuensa Anni Guttorm Govva: Susanna Guttorm / Yle

Máttut-čájáhus lea čohkkejuvvon Sámemusea Siidda govvačoakkáldaga govain. Čájáhusa govat leat váldojuvvon birra Sámi, earret eará Anáris, Ohcejogas, Čeavetjávrris ja Eanodagas.

– Stuorámus oassi dain govain lea boahtán skeŋkejupmin midjiidde. Doppe leat sihke sápmelaš govvejeaddjiid govat ahte maiddái earáid govat, geat leat johttán dáppe Sámis, muitala amanuensa Anni Guttorm.

Siidda čoakkaldagat dál maid neahtas

Sámemusea lea almmustahttán odne maiddái iežas čoakkáldagaid vuosttas háve interneahtas buohkaide rabas ohcanbálvalus Finnas, www.finna.fi. Sámemusea čoakkáldagaid almmustahttet vuosttas háve Finna-bálvalusa almmolaš diehtovuođus. Finna lea museaid, arkiivvaid ja girjerájuid oktasaš ohcanbálvalus.

Riikkaidgaskasaš museabeaivve  Sámemusea čoakkáldagain Finnas almmustahttet badjel 500 dávvira. Sámemusea čoakkáldagain Finnas beassá vuosttamužžan geahčadit Museaguovddáš Vapriikki ja Hämeenlinna gávpotmusea skeŋken sámečoakkáldagaid, gahpir- ja beaskačoakkáldagaid ja Nuortalaččaid árbevierrodálu dávvirčoakkáldaga.

Sámemusea Finna almmustahttin lea Siidda auditorias dmu 13.00.

Anni Guttorm lei mielde Buorre iđit-sáddagis 18.5.2017.

Beaiváduvvon 18.5.2017 dmu 12.48: bajilčála nuppástuhtton

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä