Sápmi |

Suohpanterrora Deco2onizing Minds –čájáhusa rahpandoalut odne Helssegis

Suohpanterrora Deco2onizing Minds –čájáhusa rahpandoalut leat odne diibmu 18.00 Saariaho Järvenpää -galleriijas Helssegis. Jenni Laiti muitala, ahte rahpandoaluin galggašii dáhpáhuvvat juoidá earenoamáš.

Jietna: Jenni Laiti
Jietna

Suohpanterror-joavku Jenni Laiti muitala, ahte čájáhusa fáddá boahtá ovdan jo čájáhusa namas.

– Nugo namma jo muitala, sáhka lea dekoloniseremis ja maiddái dakkár industriála máilmmi dekoloniseremis. Dat lea dakkár váldofáddá. Ja dieđusge dan čájáhusas mii gieđahallat oalle olu Deanu soahpamuša.

Čájáhusas lea okta govvaráidu, mas sámegielat sánit leat jorgaluvvon eaŋgalsgillii.

– Dat sisttisdoallu lea olu dekoloniseren, muhto mii háliidit dieđusge maiddái loktet sámegiela ja maiddái čájehit olbmuide ahte dát sámegiella lea hui sátnerikkis ja doppe leat olu sánit maid sáhttá geavahit vaikko man láhkai. Ja maiddái loktet oidnosii dán sámegiela váldoservodahkii, ahte dat oidnet ahte sámegiella lea oalle fiinna giella. Ja dat maiddái dieđusge lea dat min máhttu ja mis lea olu dadjamuš.

Laiti ii sáhttán vel muitalit eanet čájáhusa oasis, mii guoská Deanu soahpamuša.

– Dat mii guoská dan Deanu soahpamuššii, mun in sáhte nu olu muitalit vel dán čájáhusa birra. Muhto doppe bohtet leat dakkár dajaldagat, mat gusket dán Deanu soahpamuššii ja dan gieđahallamii.

Sávvá buot manná plána mielde

Jenni Laiti muitala, ahte rahpandoaluin galggašii dáhpáhuvvat juoidá eareanoamáš.

– Jurdda lea aŋkke nu. Oaidnit leš mo dat ollašuvvá dasto duohtavuođas. Muhto mun sávan buot manná plána mielde. Mii de dainna bođeš geavvat, dat boahtá sáddejuvvot doppe Facebookas, Saariaho Järvenpää –facebooksiidduin. Doppe sáhttá fitnat guovlamen ahte mii dat doppe geavvá. 

Muhtimat Suohpanterrora lahtut leat mielde čájáhusa rahpamis, muhto Laiti ii ieš beassan báikki ala.

– Mun in dađe bahábut ieš beassan dohko báiki ala muhto doppe leat olbmot báiki alde. Dát čájáhuskonseapta lea nie, ahte doppe boahtá olles áigge dáhpáhuvvat juoidá, ahte dat čájáhus eallá. De gánneha čuovvut dan Saariaho Järvenpää facebookas ja maiddái Suohpanterrora facebooksiiddus. Dat čájáhus ovtta láhkai joatkašuvvá doppe sosiála medias, muhto maiddái doppe báiki alde.

– Dál lea leamaš vehá hástaleaddji ráhkkanit dán čájáhussii go dát Deanu soahpamušášši lea juste dál gieđahallan vuolde ja dál mii leat dieđusge buohkat vuordimen dan mearrádusa maid riikkabeaivvit mearridit. De mii dasto reageret dasa dan čájáhusas, ja dieđusge mii navdit ahte dat soahpamuš manná čađa, dađi bahábut.

Čájáhus lea oaidninláhkái 13.4. rádjái.

Jenni Laiti lei mielde Dearvva-sáddagis 16.3.2017.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä