Sápmi |

Suoma stuorámus bellodat lohpida ovddidit sámiáššiid

Sámiáššit loktanedje lunddolaččat bajimužžan, go SDP ságajođiheaddji Antti Rinne galledii Ohcejotnjálmmis. Son lohpidiige, ahte sii bidjet johtui čielggademiid sámiáššiid dálá dilis.

Video: Antti Rinne
Video

Go soames riikabeaiáirras galleda Ohcejogas, de illá moattis gillejit boahtit guldalit. Sosialdemokráhtaid ságajođiheaddji Antti Rinne goit sotnabeaivve geasuhii stobu dievva.

– Munnje muitaluvvui, ahte ná čáppa dálkin olbmot sáhttet leat mannan duoddarii, muhto somá go nu ollusat bohte ja lea maid buorre gullat eambo olbmuid oaiviliiid, dadjá Rinne.

"Sápmelaš šaddan garrusátnin"

Sámi riekteáššit dat lunddolaččat loktanedje bajimužžan, dego Deanu soahpamuš, man gieđahallan álgá maŋŋebárgga riikkabeivviin. Dashan sámirievttit sihkastuvvojedje eret. 

Ohcejoga váldostivra ságajođiheaddji Aulis Nordberg namuhii, ahte dán áigái juos oktage duostá jienádit sámirivttiin maidige, dego ILO-soahpamuš, Deatnu dahje juoba Ohcejoga searvegoddi, dalán álgá issoras sápmelaččaid garuheapmi.

– Sápmelaš lea juo garrusátni suomagillii, ii sáhte hállat maidige sámeáššiid, ahte ii juoga geahča, ahte maid helvehii don meinnet. Joo, dat lea dakkár, ollesáiggi lea oidnosis fuones atmosfära.

Rinne lohpida ovddidit ILO-soahpamuša ratifierema

Go politihkkarat dábálaččat dušše jorbestallet sániideaset, de lohpidii Rinne, ahte sii bidjet dál sámiáššiid fas johtui. Deháleamos guoská ILO 169- soahpamusášši ovddideame.

– Lohpidan, ahte min bellodat SDP čielggada dan maid ILO-soahpamuša ratifieremiid sáhttá bargat ja oažžut dan fápmui, dadjá Rinne.

Oaiviliskkademiid mielde oppošisuvnnabellodat SDP lea dál gielddaválggaid vuolde njunnožis.  Sin fártta jáhkket reahkkát maid čuovvovaš riikkabeaiválggaide ja Rinnes šaddá čuovvovaš stáhtaministtar. Nuba sus vurdojuvvoge beasti, mii njulge dálá ráđđehusa boastuvuođaid sámiáššiin.

– Mun hálidan dál, ahte buot ILO-soahpamuššii gullevaš váttisvuođat čielggaduvvojit ja gávdnat čovdosiid, ahte oažžut sámiáššiid ortnegii nu, ahte dat lea buorre buohkaid dáfus.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä