Sápmi |

Video: Holmberg gaikkui "kolonialistalaš guolástanlobi" Suohpanterrora performánssas

Ylva ja Suohpanterrora performánssas Ijahis ijas Niillas Holmberg gaikkui plakáhta, mas logai kolonialistalaš guolastanlohpi. Eallijoavku geigii olbmuide "Sámi guolástanlobiid". Suohpanterrora Jenni Laiti muitala, ahte olbmot áigot váldit lobiid guolástanmátkkiide fárrui.

Video: Ylva ja Suohpanterror
Video
Video: Yle

– Ijahis ijas Guolástanlohpeperformanssa áigge olbmot imaštalle ja amastalle, muitala Jenni Laiti Suohpanterroris.

Jenni Laiti
Jenni Laiti Ijahis ijas 2016. Govva: Vesa Toppari / Yle

Ylva ja Suohpanterrora performánsa válddii garrasit beali Deanu ođđa soahpamuša vuostá, sámiid guolástanvuoigatvuođaid beales ja maiddái ođđa guolástanlága vuostá.

Ylva ja Suohpanterror, Ijahis idja 2016
Govva: Jonne Järvinen / Yle
Proteastaperformánsa lei oassi Ylva Ijahis ija konseartta váldolávdi alde ja dat streamejuvvui miehtá máilmmi.

Holmberg gaikkui guolástanlobi

Ylva maŋimuš bihttá áigge spiidnin gárvodan olmmoš buvttii lávddi ala plakáhta, mas logai Colonialistic fishing licence denied, Koloniastalaš guolástanlohpi gildojuvvon.

Ylva juoigi Niillas Holmberg gaikkui dan lávddi alde.

Ylva ja Suohpanterror, Ijahis idja 2016
Govva: Paadar Images / Ijahis idja
– Buorit olbmot, lean boahtan muitalit, ahte vai mun sáhtán leat sápmelaš, mun ferten rihkkut lága. Ja dan mun dagan. Don doloža rájes mii leat guolástan. Guolásteapmi lea okta min váldoealáhusain. Dán jagi Suoma kolonialistalaš ráđđehus rivvii mis min olmmošrievtti borramuššii, Holmberg sártnui lávddi alde.

Ylva ja Suohpanterror, Ijahis idja 2016
Govva: Jonne Järvinen / Yle
– Muhto buorit olbmot, lean boahtan muitalit, ahte áiggit leat rievdamin. Ja oktii vel lea álkit fidnet guolástanlobi go ruvkelobi Sápmái, Holmberg loahpahii.

Eallit geigejedje "Sámi guolástanlobiid"

De eallin gárvodan olbmot lávkejedje lávddi alde ja geigejedje olbmuide koarttaid, main logai sámi guolástanlohpi.

Sápmelaš, dus lea riekti guolástit čáziin, mat gullet du sohkii ja main du máttut leat guolástan. Dát vuoigatvuohta lea álo leamašan, ja lágat mat dan gomihit, eai leat goassige dovddastuvvon.

Suohpanterrora uolástanlohpi, Ijahis idja 2016
Govva: Pirita Näkkäläjärvi / Yle
Loahpas lávddi ala bođii vel spiidnin gárvodan olmmoš, gean báiddis logai Mun vuollánan.

Laiti: Olbmot áigot váldit guolástankoarttaid guolástanmátkkiide fárrui

Suohpanterrora Jenni Laiti, ahte sii ožžo performánssa maŋŋá positiiva máhcahaga.

– Olbmot áigot váldit guolástankoarttaid guolástanmátkkiide fárrui. Okta jearai ahte oažžugo geavahit su boahttevaš nákkosgirjji olggožis koartta.

Jenni Laiti áhku báikkis Ánárjogas, mii lea okta Deanu oalgejogain.
Jenni Laiti áhku báikkis Ánárjogas, mii lea okta Deanu oalgejogain. Govva: Suohpanterror
Laiti sávvá, ahte guolástankoarttat muittuhit ruovttuin min árbevuoigatvuođain, ahte mis áiggiid álggu rájes lea leamaš vuoigatvuohta guolástit iežamet guovlluin iige giige sáhte rivvet eret dan rievtti.

– Koarttain ávžžuhit olbmuid ain joatkit doalaheamis guolástanvuoigatvuođaid ja joatkit guolásteami nugo leat máŋggaid sohkabuolvvaid dahkan. Guolástemiin eat leat rihkkumin iežamet vuoigatvuođaid, baicca Suoma stáhta rihkku min eamiálbmotvuoigatvuođaid guolástanláhkaođastumiin ja Deanu soahpamušain, Laiti dadja.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä