Sápmi |

Vuosttaš sámi guhkesfilbma mánáide barggu vuolde

Sámi Filbmainstituhtta (ISFI) vuoruha mánáid ja nuoraid filmmaid, go dál juolluda buvttadandoarjagiid. Vuosttaš sámi guhkesfilbma mánáide lea barggu vuolde.

sáve filbma
«SÁVE» lea bargonamahus vuosttaš sámi guhkesfilmmas mánáide. Govva: PREASSADIEĐÁHUS / ISFI

Dán háve vuoruhii ISFI filbma prošeavttaid mánáide ja nuoraide, go gávdnojit nu unnán sámegielat filmmat dán gehččiid jovkui. Vuosttaš sámi guhkesfilbma mánáide lea barggu vuolde.

– Mii illudit sakká ođđa sámi mánáidfilmmaide, ja erenoamážit vuosttaš sámi guhkesfilbmii mánáide ja nuoraide. SÁVE lea guhkesfilbma maid Jens Martin Mienna lea čállán ja Khalid Maimouni, Storyline Pictures áigu buvttadit, muitala  Internašunála Sámi Filbma Instituhta direktevra Anne Lajla Utsi.

Filbmabuvttadeaddjit áigot giehtačállosa vel válbmet ja ohcat loahppabuvttadeapmái ruđa.

–ISFIas illudit dan beaivái go sáhttit sámi ja eará mánáid bovdet historjjálaš vuosttašeahkedii. Filmmas SÁVE deaivá oahpes sámi muitalus karakteraid, dego stálu ja ulddaid, muitala Anne Lajla Utsi.

– Mun lean áibbas sihkar ahte dát erenomaš muitalus šaddá sihke fámolaš ja somá oallut gehčiide sihke Norggas ja muđui máilmmis. Dál mii váldit mielde prošeavtta Cannes filbma festiválii, gávdnan dihte ovttasbargoguimiid, geat sáhttet veahkkin midjiide ollášuhttit dán ehpalaš filmma, dadjá buvttadeaddji Khalid Maimouni.

ISFI juolludeamit

Internašunála Sámi Filbmainstituhtta (ISFI) oaččui 11 filbmabuvttadan ohcama njukčamánus ja oktiibuot ohce 2.5 MNOK sámi filmmaide. Boahtte juolludeapmi lea čakčamánus 2017.

Internašunála Sámi Filbmainstituhtta lea juolludan čuvvovaš filbmadoarjagiid cuoŋománus 2017:

SÁVE Vuosttaš sámi guhkesfilbma mánáide ja nuoraide, 200 000 kr .Vuosttaš sámi mánáid guhkesfilbma, buvttadan ovdánahttin doarjja. Čálli: Jens Martin Mienna, buvttadeaddji: Khalid Maimouni, Storyline Media

GUMPE oanehisfilbma, 70 000 kr. GUMPE lea oanehis filbma dramáhtalaš deaivvadeami birra ávdin lávus duoddaris. Buvttadeaddji: Davas Film Ken Are Bongo

MOOMINS AT CHRISTMAS guhkesfilbma dubben davvi sámegilli, 150 000 kr. Ođđa Moomi guhkesfilbma dubbejuvvo davvisámegillii ja galgá čajehuvvot sámegillii maid kinoin. Buvttadeaddji: Filmkompaniet Alpha AB Oy, Tom Carpelan, dubben bagádalli: Sara Margrethe Oskal.

BEAIVVI BÁRDNI - sámegielat teksten, 30 000 kr. Beaivvi Bárdni dokumentára filmma teksten davvisámegilli. Giraff Film AB, buvttadeaddji Anna Bjørk bokte.

MÁINNASGIISÁ - animašuvdna ráidu mánáide, 200 000 kr. Animašuvdna ráidu árbevirolaš sámi muitalusain, mánáide 7 jagis bajás. Buvttadeaddji: John Erling Utsi, Sámi Kompania AB

SÁNIT babyfilmmat, 300 000 kr. 7 x 7 sátnefilmmáža davvisámegillii unnimus mánáide. Buvttadeadji ja bagádalli: Ann Film/Ann Holmgren.

sanit filbma
Govva: PREASSADIEĐÁHUS / ISFI
 

Oktiibuot juolludii Internašunála Sámi Filbmainstituhtta 950 000 kr doarjagiid ođđa sámi filmmaide. Dasa lassin leat čuvvovaš filmmat ožžon ovdanahttin doarjagiid dán radjái 2017is:

UTSI guhkesfilbma manus, Susanne Hætta 30.000

FAAMOE drama ráidu, Bauta Film AB 60.000

NUORTALAČČAT dokumentára , Siivet AS 60.000

BIELLU NJUOVČČA, Marja Bål Nango/Ingor bål Nango 30.000

GIITU ÁNUT, oanehisfilbma, Olve Aslaksen 25.000

EN MANN I ET FUKTIG TELT I HAGEN, Egil Pedersen, guhkesfilbma manus 60.000

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä