Sápmi |

Sara: TeliaSonera dájuha lismálaččaid

Teleoperáhtor TeliaSonera dájuha olbmuid fálaldagainis hukset čuovgakábeloktavuođa Anára Lismái. Dán oaivilis lea Magreta Sara, guhte ii áiggo vuollánit albma interneahtta- ja mátketelefonoktavuođa oččodeamis iežas gillái.

Mannan vahkus TeliaSonera almmuhii media bokte, ahte dat hukse 3G-telefonstašuvnna ja geassá ovtta mega čuovgakábela Lismmá gillái Oarje-Anárii. Seamma oktavuođas fitnodat juo almmuhii, ahte plánen ja huksen sáhttá ádjánit vel guhká.

- Sonera lea gal lohpidan midjiide oktavuođaid ordnet, muhto mu mielas orru, ahte dat figget jávohuhttit min. Dego čájehit Suoma álbmogii, ahte sii leat mahkeš ordnemin oktavuođaid. Sonerahan muitalii, ahte sii áigot cegget 3G-mástta Lismái, muhto áigedávvala sii eai muitalan. Dat lea máŋgga jagi prošeakta, lohká Sara.

Lismmás eai váldde duođas Sonera ságaid čuovgakábeloktavuođa ordnemis.

- Sii muitaledje, ahte áigot hukset midjiide čuovgakábelneahta, muhto ii oro doallamin deaivása. Dat livččii dušše Riebanjoga ja Lismmá gaskkas. Livččii hui ártet, jus lismálaččat oaččošedje Anáris vuosttažettiin čuovgakabelneahta, árvala Magreta Sara.

Lismmá gili olbmot áigot leat oktavuođas diehtojuohkindoaimmahagain dáinna áššiin.

- Mii lismálaččat galgat beannot vahku siste addit cealkámuša TeliaSonera fálaldagas. Čállit diehtojuohkindoaimmahahkii (su. viestintävirasto) iežamet oaivila das, man buorre dát fálaldat lea, dadjá Sara.

Lismmá gilli leamašan dán rádjai mátketelefon- ja dihtoroktavuođaid haga. Lága mielde juohkehaččas lea vuoigatvuohta oažžut telefonoktavuođa ja ovtta mega neahttaoktavuođa fásta orrunbáikásis. Lismmá gilis dát vuoigatvuohta ii leat ollašuvvan.

TeliaSonera lea addán lismálaččaide fálaldaga dihtoroktavuođas, masa searvan máksá 1 295 euro. Neahttaoktavuohta máksá 39,90 euro mánotbajis.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä