Guhkesáigásaš sámepolitihkkár Anne Nuorgam lea válljejuvvon Ovttastuvvan Našuvnnaid álgoálbmogiid bissovaš foruma, UNPFII várreságadoallin áigodahkii 2017-2019. Nuorgam lea doaibman álgoálbmogiid bissovaš foruma láhttun jagi 2017 álggu rájes.
Nuorgamis lea nana vásáhus ja máhttu álgoálbmot áššiin, nu guolástusrivttiin go maiddái árktalaš guovlluide guoski áigeguovdilis gažaldagain. Anne Nuorgam bargá dál Lappi universitehta riektediehtagiid dieđagottis sámedutkama nuorat dutkin.
Nuorgam lea doaibman Sámedikki láhttun jagi 2000 rájes ja Sámedikki várreságadoallin son lei jagiin 2004-2007. Dasa lassin son lea doaibman maiddái Sámiráđi ságadoallin jagiin 2000-2002 ja leamašan láhttun davviriikalaš sámesoahpamuš doaibmagottis ja Deanu soahpamuš doaibmagottis. Nuorgam lea maiddái nammaduvvon Ovttastuvvan Našuvnnaid eaktodáhtolaš ruhtaráju (UN Voluntary Fund for Indigenous Peoples) stivrra láhttun jagiide 2015-2020.
Dán jagaš fáddán vuoigatvuođat eatnamiidda ja čáziide
ON:a álgoálbmogiid bissovaš foruma, UNPFII (United Nations Permanent Forum on Indigenous Issues) lea ON:a ekonomiija- ja sosiálaráđi ECOSOC vuollásaš ráđđeaddiorgána. Forumii gullet 16 sorjjaskeahtes áššedovdiláhttu, main ECOCOC:a ságadoalli vállje gávcci iešguđet álgoálbmotguovllus ja álgoálbmot organisašuvnnaid evttohan evttohasain. Loahpaid gávcci láhttu ECOSOC vállje válggain stáhtaid ásahan evttohasain. Ovdamearkka dihte Nuorgama ásahedje bissovaš foruma evttohassan Sámiráđđi ja Inuit Circumpolar Council ja su válljema doarjjui Sámi Parlamentáralaš ráđđi.
Nuorgam lea vuosttas sápmelaš nissonláhttu ja várreságadaolli bissovaš forumis. Maŋimuš sápmelaš lahttu bissovaš forumis lea leamašan Lars Anders Baer jagiin 2008-2010. Ole Henrik Magga fas doaimmai álgoálbmogiid bissovaš foruma vuosttaš ságadoallin jagiin 2002-2004.
Bissovaš foruma ulbmilin lea loktet ságastallamii álgoálbmogiidda guoski ja čuohcci gažaldagaid eandalitge ekonomalaš ja sosiálalaš ovdáneamis, kultuvrras, birasáššiin, skuvlenáššiin, dearvvašvuođas ja maiddái olmmošvuoigatvuođain. Bissovaš forum rávve stáhtaid, ráđiid, ON:a sierraorganisašuvnnaid ja doaibmá ságastallanforuman álgoálbmogiid ja stáhtaid gaskkas. Bissovaš forum čoahkkana jahkásaččat logi beaivái New Yorkii ON:a váldovistái. Dán jagaš foruma fáddán leat álgoálbmogiid vuoigatvuođat eatnamiidda ja čáziide.
UNPII ordnejuvvo New Yorkas 16. -27.4.