Miestagat ja soagit juohke sajis, iige Deatnu oba oidnoge. Báikki olbmuid dat lea váivvidan juo guhká ja máŋgga eará olbmo maiddái. Leahan dat Suoma viidosaččatge árvvusadnon duovdagat.
– Dat lea dehálaš, ahte johka oidno. Nu máŋgasat leat čállán aviissaide, ahte fertešii juoidá bargat dan ovdii. Dat lea jo jávkan dat johka, dadjá gáregasnjárgalaš eaktodáhtolaš Juha Pohjanraito.
Son lea máŋgii ieš maid smiehttan, ahte livččii dehálaš čábbudahttit Deanuleagi.
Miestagiidda fártta eaktodáhtolaš fámuiguin
Dán geasi Deatnogáttis leat njáskan miestagiid vai dát divrras kulturbiras oidnošii johttiide.
Barggut leamaš jođus dán geasi Suoma bealde moattelogi sajis miehtá Deatnogátti. Miestagiidda leat addán fártta eaktodáhtolaš fámuiguin ja EU-prošeavttain.
– EJB-guovddáža olbmot leat guorahallan ja jearran báikkálaš olbmuin, ahte gos galggašii njáskat oidnosii, muitala Meahciráđđehusa eanageavaheami áššedovdi Tuomo Kokkoniemi.
Eaktodáhtolaččat leat ovttas vuovdedoalu ámmátolbmuiguin bargan vai šaddá fiinna oainnus. Ulbmil lea, ahte boahtte áiggis báikki olbmot ieža doalašedje johgáttiid čorgadin.
Juha Pohjanraitoi dát bargu leat buktán buorre miela lassin juoga earáge.
– Dieđusge lea valástallan, oažžu vehá boaldinmuoraid ja deaivá olbmuid.
– Biibbalisge daddjo, bivastat gállos galggat don láibámet ovdii bargat. Vehá bivastuvvan gal lean. Dat lea somá, mun liikon dákkár bargui, dadjá mojunjálmmiin Juha Pohjanraito.